थारु भाषिक जागरणमा साहित्य सम्मेलनको ठुलो भुमिका छ : सर्वहारी

कालपृष्ठ समाचारदाता
नेपालगन्ज, २३ माघ

थारु लेखक संघ र थारु गोचाली समाज फत्तेपुरले यही २०–२२ माघसम्म तीन दिन आयोजना गरेको सम्मेलन सकिएको छ । १२ बुँदे घोषणा पत्र जारी गरी आइतबार सो सम्मेलन सकिएको हो । समापन समारोहमा बोल्दै थारु लेखक संघका अध्यक्ष डा. कृष्णराज सर्वहारीले बाँकेको राप्तीसोनारीमा सम्पन्न ७ औं राष्ट्रिय थारु साहित्य सम्मेलनले थारु भाषिक जागरण ल्याउने दाबी गरेका छन् । उनले कार्यक्रम समापन गर्दै सो सम्मेलनले थारु भाषिक जागरण ल्याउने दाबी गरेका हुन् ।

कैलालीको पटेलामा आयोजना गरिएको दोस्रो साहित्य सम्मेलनकै कारण त्यहाँका बरघरहरु एक जुट भएर थारु संग्राहलय बनाउन सफल भएको उदाहरण दिँदै उनले बाँकेमा गरिएको सम्मेलनमा थारुको जनजीवनमा कलम चलाउने गैर थारु साहित्यकारहरुलाई सहभागी गराएका कारण गैरथारु ठूला सहित्यकारको प्रभाव थारु साहित्यकारमा पर्दै गएको बताए । उनले दाङ, देउखुरी, बाँके, बर्दिया, कैलाली, कञ्चनपुर र सुर्खेतमा थारु सहित्यकारको अवस्था हेरेर लुम्बिनी प्रदेशमा प्रज्ञा प्रतिस्ठान बन्नुपर्ने आवश्यकता औंल्याउँदै केन्द्रको प्रज्ञा प्रतिस्ठानमा थारु सदस्यलाई प्राज्ञ बनाउन नसक्नु राज्यको कमजारी भएको बताए ।

७ औं राष्ट्रिय थारु साहित्य सम्मेलनमा ६ वटा विविध विषयमा छलफल, बहस गरिएको थियो । राप्तीसोनारीको विकासकालागि प्राथमिकताहरु, आदिवासी भाषा दशक र बाँकेको मातृभाषा, विकासमा वरघर, होमस्टेमा थारु समुदाय, आख्यानमा थारु, बाँकेमा थारु साहित्यको अवस्था, थारु साहित्यमा युवा र सिकलसेल एनिमियाको कहरले जनस्वास्थ्यमा पारेको प्रतिकूल असरबारे विषयगत सम्बन्धित ब्यक्तित्वहरुलाई प्यानलिस्ट बनाएर छलफल गरिएको थियो ।

बहसमा पत्रकार विमला चौधरी, लेखक शेखर दहित, सञ्चारकर्मी तथा बरघर अभियन्ता एकराज चौधरी, सञ्चारकर्मी तथा साहित्यकार नविन अभिलाषी, साहित्यकार सागर गैरे, लेखिका बालिका चौधरी, सिकलसेल एनिमिया रोकथामका अभियान्ता प्रभुराम चौधरी, राजन पाण्डे, युवा साहित्यकार भूमिका थारुलगायतले सहजकर्ताको भूमिका निभाएका थिए । यस्तै सम्मेलनको कि–नोट स्पीकरको रुपमा अनुसन्धानकर्ता डा. गोविन्द आचार्यले, थारु समुदायको इतिहास, संस्कार, संस्कृति, रहनसहनबारे ब्याख्या गरेका थिए ।

कोरोना कहरले यस बर्ष थारु भाषाका नयाँ पुस्तक धेरै नभएपनि लक्ष्मी रानाले लेखेको सोरठ र गणेश वर्तमानले लेखेको ट्वाना उपन्यासको विमोचन गरिएको थियो । सम्मेलनमा कथा संग्रह सोरठ लेखिका लक्ष्मी रानालाई २५ हजार २५ रुपौयाँ नगदसहित सम्मान गरिएको थियो भने थारुको जनजीवनमा कलम चलाउँदै आएकी साहित्यकार किरण आचार्यलाई कदर पत्रले सम्मान गरिएको थियो । कार्यक्रममा विभिन्न विद्याका रचना वाचन, सांस्कृतिक प्रस्तुतीलाई पनि स्थान दिइएको थियो । सम्मेलन ब्यवस्थापनको मुख्य भमिकामा थारु गोचाली समाजका अध्यक्ष देखलाल थारु, महासचिव कालुराम थारु (समर्पण), कोषध्यक्ष सुनिता थारुलगायतका सदस्यहरु रहेका थिए ।
सम्मेलनलाई स्थानीय पालिका, वडा कार्यालय, सामुदायिक वन उपभोक्ता समूह, बरघरलगायतले सहयोग तथा सहकार्य गरेका थिए ।