साईन्स फेस्टिवलको उद्घाटन सुचना तथा संचार प्रविधि मन्त्री रेखा शर्माले गर्ने

कालपृष्ठ समाचारदाता
नेपालगन्ज, २० माघ

नेपालगन्जमा हुन लागेको हिमालयन साईन्स फेस्टिवलको दोस्रो संस्करणमा प्रमुख अतिथिको रुपमा सुचना तथा संचार प्रविधि मन्त्री रेखा शर्मा आउने भएकी छिन् । हिमालयन साईन्स फाउण्डेशनको आयोजनामा नेपालगन्जको रंगशालामा फागुन २ र ३ गते साईन्स फेस्टिवलको आयोजना हुँदैछ । साईन्स फेस्टिवलको लागि दिएको निमन्त्रणालाई स्वीकार गर्दै मन्त्री शर्माले आउने बताउनु भएको आयोजक हिमालयन साईन्स फाउण्डेशनका अध्यक्ष आतंक बस्नेतले बताए ।
उनले भने,‘हामीले फेस्टिवलको माध्यमबाट नेपालमा विज्ञान र प्रविधिको विकासको लागि नितिगत रुपमै राज्यले वातावरण निर्माण गर्नु पर्छ भन्ने विषयलाई उठान गरिरहेका छौं ।मन्त्रीको आगमनले त्यो मुद्दाहरुको बारेमा छलफल र कार्यान्वयन गर्न सहयोग प्राप्त हुने हामीले विश्वास लिएका छौं ।’

…………….

फाउण्डेशनले नेपालमा विज्ञान र प्रविधिको विकासलाई प्राथमिकतामा राख्नको लागि फाउण्डेशनले विभिन्न सरोकारवाला निकायलाई ध्यानाकर्षण गराउँदै आएको छ । नेपालगन्जमा हुन लागेको फेस्टिवलले विद्याथीहरुलाई विद्यालय स्तरबाटै खोज र अनुसन्धानमा अभिरुची जगाउने अध्यक्ष बस्नेतले बताए ।

यसैगरी फेस्टिवलमा विश्वको प्रख्यात ब्रान्ड अमेरिकन कम्पनी एप्पलका पुर्व सफटवेयर आर्किटेक्ट विजय गौतम र नेपाल एकेडेमी अफ साईन्स एन्ड टेक्नोलोजीको(नास्ट) सिनियर साइनटिस्ट डा.टिस्टा प्रसाई जोशीले निर्णायक मण्डलको भुमिका निर्वाह गर्नेछन् ।
आइटी विज्ञ समेत रहेका इन्जिनियर गौतम अमेरिकन कम्पनी एप्पलमा काम गरेर नेपाल फर्किएका युवा हुन । उनले पछिल्लो समय नेपालमा काम गरिरहेका छन् । नेपालको विज्ञान र प्रविधिको क्षेत्रको विकासमा काम गरिरहेको संस्था नास्टको सिनियर साइनटिस्ट टिस्टाले नेपालगन्जमा हुन लागेको फेस्टिवलमा निर्णायकको रुपमा काम गर्ने आयोजकले बताएको छ ।

निर्णायक मण्डलका लागि छनोट गरिएका दुई व्यक्ति नेपालमा विज्ञान र प्रविधिको क्षेत्रमा उच्च स्तरीय योगदान र सफलता हासिल गरेको व्यक्ति भएको फेस्टिवल आयोजक हिमालयन साईन्स फाउण्डेशनका अध्यक्ष आतंक वस्नेतले बताए ।
फेस्टिभललाई वालाबिज एजुकेशनल सर्भिसले मुख्य प्रायोजन गरेको छ भने प्याब्सन बाँके, प्याब्सन नेपालगन्ज र विज्ञान शिक्षक समाज नेपालले सहयोग गरेको छ । फेस्टिवलमा करिब ५० वटा स्टल राखिने छ । जसमा कक्षा ८ देखि १२ सम्मका सरकारी र निजि विद्यालयका विद्यार्थीले आविष्कार गरेका विज्ञान र प्रविधिका प्रोजेक्टहरु प्रदर्शनी गरिनेछ । फेस्टिभलमा सहभागि हुनेहरुले विभिन्न ९ विधामा आफनो प्रोजेक्ट प्रस्तुत गर्नेछन् ।