युनियन बाँकेले पत्रकारहरुको निःशुल्क मिर्गौला परीक्षण शिविर गर्दै

कालपृष्ठ समाचारदाता
नेपालगन्ज, २५ भदौं
नेपाल प्रेस युनियन बाँकेले मंगलबार प्रेस स्वतन्त्रता सेनानी स्व. पन्नालाल गुप्त ‘चाचा’को जन्मजयन्तीको अवसरमा पत्रकारहरुको लागि निःशुल्क स्वास्थ्य परीक्षण गर्ने भएको छ । गुप्त प्रेस युनियन बाँकेका संस्थापक पनि हुन ।
युनियन बाँकेले संस्थापक गुप्तको जन्मजयन्तीलाई भव्य रुपमा मनाने क्रममा बाँकेमा क्रियाशिल रहेका पत्रकारहरुको लागि निःशुल्क मिर्गौला परीक्षण शिविर आयोजना गर्न लागेको हो ।

बाँके शाखाका संस्थापक अध्यक्ष, प्रेस स्वतन्त्रता सेनानी गुप्तको ९५ औं जन्मजयन्तीको अवसरमा सेन्ट्रल सिटी हस्पिटलमा मिर्र्गाैला परीक्षण कार्यक्रमको आयोजना गर्न लागिएको हो ।
नेपाल प्रेस युनियन बाँके शाखा र वरिष्ठ पत्रकार स्व.पन्नालाल गुप्त प्रतिष्ठानको आयोजना तथा सेन्ट्रल सिटी हस्पिटलको सहकार्यमा मिर्गौला परीक्षण कार्यक्रमको आयोजना गरिएको सचिव भिष्म लोधले बताए ।

उनले भने, ‘भदौं २६ गते मंगलवार विहान ७ बजेदेखि १० बजेसम्म पत्रकारहरुका लागि निःशुल्क मिर्गौला परीक्षण कार्यक्रमको आयोजना गरिएको छ । यसले पत्रकारहरुलाई आफ्नो स्वास्थ्य सजगतासँगै मिर्गौलाको अवस्थाबारे पनि थाहा हुनेछ । समस्या देखिए समयमै रोगको पहिचान गरेर उपचारमा पनि सहजता मिल्नेछ ।’

पछिल्लो समय अस्वस्थ खानपान, फेरिँदो जीवनशैली लगायतका कारणले मिर्गौलाको समस्या विकराल बन्दै गएको छ । वरिष्ठ युरोलोजिष्ट डा. दिपेश गुप्ता नेतृत्वको टिमले पत्रकारहरुको निःशुल्क स्वास्थ्य परीक्षण गर्नेपनि सचिव लोधले बताए ।

योसँगै स्व.गुप्तको जन्मजयन्तीमा बुधबार २७ गते नेपालगन्ज महेन्द्र पुस्तकालयमा दिउँसो अन्तरक्रिया कार्यक्रमको पनि आयोजना गरिएको छ । पत्रकारिताको वर्तमान अवस्था, सम्भावना र चुनौति विषयक उक्त अन्तरक्रियामा यसक्षेत्रका नागरिक समाज, अधिबक्ता, बुद्धिजीवि, संचारकर्मी लगायतको उपस्थिति रहने छ ।