संक्रमण दर घट्दै, सतर्क हुन आवश्यक

व्यवस्थापन समितिको तथ्यांकलाई हेर्ने हो भने बाँकेमा

मृत्यु हुने जम्मा संक्रमितको ८० प्रतिशतभन्दा धेरै

छोटो समयको दोस्रो लहरमा रहेको छ ।

विक्रम बुढाक्षेत्री
नेपालगन्ज, ५ असार
कोभिड-१९ को प्रभाव नेपालमा गत सालको अन्तिमबाट सुरु भयो । विश्वभर प्रभाव पारेको कोभिडले हालसम्म नेपालमा पनि लाखौं संख्यामा नेपालीहरुलाई संक्रमित बनायो भने हजारौं संख्यामा संक्रमितको मृत्यु पनि भयो । साथै कोभिड संक्रमित भएका निको हुनेको संख्या पनि लाखौंमा रहेको छ ।
कोभिडको पहिलो लहर नामाकण गरिएको गत सालको कोभिड प्रभावले बाँकेलाई पनि क्षति बनायो । तर गत चैत अन्तिमबाट पुनः जिल्लामा फैलिएको दोस्रो लहरको प्रभाव भने पहिलो लहर भन्दा धेरै रह्यो । गत एक सालमा कोभिडका कारण बाँकेले ब्यहोर्नु परेको क्षतिको लगभग तेब्बर क्षेति बाँकेले गत दुई महिनामा व्यहोरेको छ ।
हालसम्म बाँकेमा संक्रमितको संख्या १७ हजार तीन सय ९३ पुगेको छ । जसमा दोस्रो लहरमा मात्रै १२ हजार चार सय ३५ जनामा संक्रमण पुष्टि भएको छ भने पहिलो लहरमा जम्मा चार हजार नौ सय ५८ जना संक्रमित भएको जिल्ला कोभिड व्यवस्थापन समिति बाँकेको तथ्यांकले प्रष्ट्याउँछ ।
त्यसैगरी जिल्लामा हालसम्म तीन सय १० जना संक्रमितको मृत्यु भइसकेको छ । जसमा पहिलो लहरमा ५८ जना संक्रमितको मृत्यु भएको थियो भने दोस्रो लहरमा दुई सय ५२ जना संक्रमितको मृत्यु भएको छ ।व्यवस्थापन समितिको तथ्यांकलाई हेर्ने हो भने बाँकेमा मृत्यु हुने जम्मा संक्रमितको ८० प्रतिशतभन्दा धेरै छोटो समयको दोस्रो लहरमा रहेको छ । साथ एक वर्ष लामो पहिलो लहरको कोभिड प्रभावबाट जिल्लाको जम्मा मृत्यु संख्याको २० प्रतिसतभन्दा कम रहेको छ । त्यसैगरी पृष्टि भएको संक्रमितको संख्या हेर्दा कूल संख्याको ७० प्रतिशतभन्दा बढी दोस्रो लहरमा संक्रमित भएका हुन् । दोस्रो लहरमा नेपालको ॅकोभिड हट स्पोट्’ बनेको बाँकेमा हाल केही मात्रामा नियन्त्रण हुँदै गएको देख्न सकिन्छ । कोरोनाले गत असारको दोस्रो सातादेखि जेठको दोस्रो सातासम्म अत्यन्तै प्रभाव पारेको बाँकेमा जेठको तेस्रो सातादेखि क्रमागत रुपमा संक्रमण पुष्टि हुनेको संख्या कम हुँदै गएको पाइएको छ ।
शनिबार जिल्लामा महिला आठजना र पुरुष दुईजना गरी १० जनामा संक्रमण पुष्टि भयो । साथै थप १० जनाले संक्रमणलाई जितेका छन् भने मृत्यु हुने संक्रमितको संख्या शून्य नै रह्यो । असार १ गतेदेखि पछिको अवस्था हेर्दा संक्रमितको संख्या र मृत्यु हुने संख्यामा धेरै नै गिरावट आएको छ ।
गत शुक्रबार जिल्लामा एकजनामा संक्रमण पुष्टि भएको थियो भने २७ जना निको र शून्य मृत्यु रह्यो । साथै गत बिहीबार थप एकजना, निको २७ जना र मृत्यु शून्य थियो । गत बुधबार पनि थप ११ जना, निको २७ जना र मृत्यु एकजनाको भएको थियो ।
गत असार २ गते पनि थप सातजना, निको ४२ जना र मृत्यु शून्य रह्यो भने १ गते थप ११ जना, निको ११ जना र मृत्यु शून्य नै रहेको व्यवस्थापन समितिको तथ्यांकमा उल्लेख रेहेको छ ।
गत जेठ महिनाको तथ्यांक हेर्दा सुरुवाती समयमा ७२ दशमलव सात प्रतिशतसम्म संक्रमण पुष्टि भएको बाँकेमा अन्तिम सातासम्म आइपुग्दा १२ दशमलव ६ प्रतिशतसम्म संक्रमण दर झरेको थियो ।
स्वास्थ्य कार्यालयका बाँकेका प्रमुख धीरजंग शाह जिल्लावासीले लापरबाही गरे पुनः तेस्रो लहरको संक्रमण हुन सक्ने बताउँछन् । ॅअहिले कोरोनाको प्रभाव कम हुँदै गएको छ । हामीले लापरबाही अपनायौ भने फेरी तेस्रो, चौथो लहर पनि नआउला भन्न सकिन्छ,’ प्रमुख शाहले भने, ॅहामीले अझै पनि सतर्कता अपनाउने पर्ने अवस्था छ । सामान्य कुरा मास्क लगाउने, हात नमिलाउने, सेनिटाइजर प्रयोग गर्ने बानी बसाल्यौ भने तेस्रो लहर आउन रोक्न सक्छौं ।’