सह–महामन्त्री राठौरलाई कारबाही गर्नु पर्ने सर्त राख्दै संस्थापनका नेता

कालपृष्ठ समाचारदाता
नेपालगन्ज, २० फागुन
नेपाली कांग्रेस बाँके सभापति पदका लागि पुनः हुन लागेको निर्वाचनमा संस्थापन पक्षले कसलाई सहयोग गर्ने भन्ने बारेमा अझै निर्णय गर्न सकेको छैन । आज शुक्रबार हुन लागेको दोस्रो चरणको मतदानमा नारायण प्रसाद गौडेल र बादशाह कुर्मीबिच प्रतिस्पर्धा हुदैछ ।
पहिलो चरणमा पहिलो र दोस्रो स्थान ल्याएका गौडेल र कुर्मी बिच आज प्रतिस्पर्धा हुने लागेको हो । पहिलो चरणमा तेस्रो भएका सुरेन्द्र हमालले कसलाई सहयोग गर्ने भन्ने बारेमा अझै निर्णय नभएको संस्थापनक एक नेताले बताए ।
संस्थापनबाट सुरेन्द्र हमाललाई आधिकारिक उम्मेदवारका रुपमा निर्वाचनमा प्रतिस्पर्धा गराइएको थियो । तर केन्द्रको निर्णयलाई नेपाली कांग्रेसका सह–महामन्त्री किशोर सिंह राठौर लगायतको समुहले स्वीकार गरेको थिएन । सुरुआत देखी बादशाह कुर्मीलाई अगाडी सारिएकोले संस्थापनको आधिकारिक उम्मेदवार बादशाह कुर्मी नै भएको भन्दै कुर्मीलाई संस्थापनको उम्मेदवार भनिएको थियो ।
आज हुने निर्वाचनमा हमालले कसलाई सहयोग गर्छन भन्ने कुराले नतिजालाई प्रभावित गर्ने देखिन्छ । हमाल लगायतक केहि नेता संस्थापनको आधिकारिक निर्णय नमान्ने सह–महामन्त्री किशोर राठौरलाई केन्द्रले कारबाही गर्नु पर्ने माग राखिरहेका छन । ति नेताले भने, ‘संस्थापनको आधिकारिक उम्मेदवार भनेर पार्टी सभापतिले सुरेन्द्र हमाललाई भन्नु भयो । तर केन्द्रको निर्णय राठौर जीले मान्नु भएन । अब उहाँलाई कारबाही के हुने हो त्यसको पनि हामी पर्खाइमा छौं ।’
केन्द्रले राठौरलाई कारबाही गर्ने सर्तमा बादशाहलाई सहयोग गर्न आफुहरु तयार भएको संस्थापनका ति नेताले बताए ।
पुर्व मन्त्री गजेन्द्र हमालले यसअघि नै राठौरले आधिकारिक निर्णयलाई नमानेको कारण उनलाई कारबाही हुनु पर्ने धारणा सार्वजनिक गरिसकेका छन ।