ढकेरी बस दुर्घटनाः स्कुलले मृतकका आफन्तलाई साढे २१ लाख क्षतिपूर्ति दिने

कालपृष्ठ समाचारदाता
नेपालगन्ज, २७ साउन

बाँकेको ढकेरीमा स्कुल बसको ठक्करबाट एक जना युवकसहित २१ वटा खसी बाख्राको मृत्युको घटनामा क्षतिपूर्ति बापत साढे २१ लाख रुपैयाँ दिने सहमति भएको छ । स्कुल बसको ठक्करबाट बाख्रा चराउन गएका राप्ती सोनारी गाउँपालिका–९ का २६ वर्षीय गोविन्द वलीको र २१ खसी÷बाख्राको मृत्यु भएको थियो ।

पूर्ववडा सदस्यसमेत रहेका स्थानीय ६७ वर्षीय पूर्णबहादुर वलीले मृतकका लागि १५ लाख र २१ खसी बाख्राको लागि जनही २५ हजारका दरले साढे २१ लाख क्षतिपूर्ति उपलब्ध गराउने सहमति भएको बताए । स्कुल सञ्चालक समितिले २५ दिनभित्र १५ लाख र बाँकी रकम बीमाको रकमसँगै उपलब्ध गराउने सहमति भएको वलीले जानकारी दिए ।

त्यस्तै, मृतकका नौ महिनाका छोरालाई जहाँ पढाए पनि कक्षा १२ सम्मको खर्च सोही विद्यालयले बेहोर्ने सहमति पनि कायम भएको छ ।  बिहीबार बेलुका ५ बजेतिर पूर्वपश्चिम राजमार्ग अन्तर्गत कोहलपुरबाट पूर्वतर्फ विद्यार्थी छोड्न आइरहेको ना ४ ख ४५७० नम्बरको बसले ढकेरी पुल नजिकै ठक्कर दिँदा बाख्रा चराउन गएका २६ वर्षीय गोविन्द वलीसहित २१ खसी बाख्राको मृत्यु भएको थियो ।

ठक्कर दिने बस कोहलपुर नगरपालिका – १२ स्थित ज्ञान कुञ्ज बोर्डिङ स्कुलको हो ।  बाँकेका प्रहरी प्रमुख एसपी तुलबहादुर कार्कीले कोहलपुर नगरपालिका–१३ का २५ वर्षीय बसका चालक प्रकाश सुनार प्रहरी नियन्त्रणमा छन् । दुर्घटनालगत्तै फरार सुनारलाई प्रहरीले दुई दिनपछि नियन्त्रणमा लिएको थियो ।
प्रहरी हिरासतमा रहेका चालकले बसको ब्रेकले काम नगर्दा दुर्घटना भएको प्रहरीसमक्ष बयान गरेका छन् ।