सिँक्टाको नहर खजुरा क्षेत्रमा विस्तार गर्ने कुर्मीको प्रतिवद्धता

कालपृष्ठ समाचारदाता
खजुरा, २२ कात्तिक
लुम्बिनी प्रदेश सभा सदस्य पदका उम्मेदवार बादशाह कुर्मीले परसपुर–गौघाट सडकका कारण जनताले पाईरहेको दुख अब छिटै समाधान गर्ने बताएका छन् ।

बाँके बर्दियाका जनतालाई नेपालगन्जसँग जोड्ने सडकको स्तरउन्नती ढिलाई भएका कारण थुप्रै जनताले सास्ती भोग्नु परेको बाँके क्षेत्र नम्बर ३(ख)बाट उम्मेदवारी दिएका बर्माले बताए ।
खजुराले स्थानीय, प्रदेश, संघ र केन्द्रमा सरकार हुँदा समेत त्यो बढाउन नसक्नु दुर्भाग्यपुर्ण अवस्था रहेको बताए । उनले भने,‘म गाविस अध्यक्ष भएको बेला चार वटा गाविसले मिलेर त्यो बाटो सुरुआत गरेको थियौं । दुर्भाग्य भनौं तर आजसम्म त्यसको स्तर उन्नती हुन सकेको थिएन ।

…………….

खजुराको २ नम्बर वडाबाट दुई जना प्रदेश र संघीय सासद बन्नु भयो । तर उहाँले घर अगाडी बाटो बनाउन सक्नु भएन भने उहाँहरुले यस क्षेत्रमा कति विकास गर्नु भयो भन्ने जनतालाई थाहा छ ।’
खजुरा गाउँपालिकाका जनतासँग भेटघाट गर्ने क्रममा उम्मेदवार कुर्मीले आफुहरु विजयी भएपछि खजुरा क्षेत्रमा रहेका सम्पुर्ण अपुरा भौतिक पुर्वाधारका काम सम्पन्न गर्ने प्रतिवद्धता जनाए ।

उनले भने,‘हामी धेरै भाषण गरेर जनतालाई झुक्काउन चाहन्न । जे गर्न सक्छौं त्यो बोल्छौं । आदरणीय स्व. सुशिल कोइराला प्रधानमन्त्री भएको बेला प्रखर अस्पताललाई क्यान्सर अस्पतालमा परिणत गरेर त्यसको विकास गरेका थियौं । तर पछि त्यसमा थप विकास हुन सकिरहेको छैन । यस क्षेत्रका धेरै जनता कृषिमा निर्भर भएपनि सिंचाईको प्रर्याप्त व्यवस्था छैन । हामी जति सक्दो सिक्टा सिंचाईको नहर यस क्षेत्रका जनताको जमिनसम्म ल्याउनेछौं ।’

क्षेत्र नम्बर ३ को विकास आफु सधै इमानदार भएर लागेको संविधान सभा सदस्य समेत रहेका बादशाह कुर्मीले बताए । उनले भने,‘यस क्षेत्रबाट मैले विगतमा पनि चुनाव लडेको थिए । तर हारे । हारेर पनि मैले जनताको सेवा गर्न कहिले पछि परेको छैन । जनताको समस्यालाई समाधान गर्न म सधै लागिरहेको छु । भोलीका दिनमा जनताको सेवामा इमानदार भएर लाग्नेछु।’
खजुरा क्षेत्रको विकासमा लागि कृषिलाई आधुनिकरण र ग्रामिण उद्योगलाई बृद्धि गर्ने योजना सहित काम गर्ने कुर्मीले प्रतिवद्धता गरे ।