मौलिक परिकारलाई ब्रान्डिङ गर्ने तयारी

नेपालगन्जका स्थानीय रैथाने परिकार, चाट, बिरयानी, पानी पुरी, हलुवा पराटा, घंमन्जा, इर्मती, सेकुवा लगायतका चर्चित परिकारलाई व्यवस्थित रुपमा राती करिब १२ बजे सम्म बिक्री गर्नका लागि खुला गरिनेछ ।

कालपृष्ठ समाचारदाता
नेपालगन्ज, २६ वैशाख

नेपालगन्जका रैथाने परिकारहरुलाई प्रवद्र्धन गर्ने उद्देश्य गर्न लागिएको नेपालगन्ज फुड लेनको बारेमा मंगलबार छलफल भएको छ । नेपाल एशोसियसन अफ टुर एन्ड ट्रार्भल एजेन्ट(नाटा) बाँके च्याप्टरले जेठ १२ गते देखि नेपालगन्जको त्रिभुवन चोकमा फुड लेनको सुरुआत गर्ने तयारी गरेको छ । जसमा त्रिभुवन चोक देखि रानीतलाउ जाने बाटो सम्म रात्रीकालिन समयमा नेपालगन्जका रैथाने परिकारहरुको मेला लाग्नेछ । जसलाई कसरी व्यवस्थित गर्ने भन्ने बारेमा मंगलबार सरोकारवाला निकायसँग छलफल गरिएको थियो ।

छलफलमा नेपालगन्ज त्रिभुवन चोकका स्थानीय व्यापारी, आयोजक नाटा बाँकेका पदाधिकारी, नेपालगन्ज उद्योग वाणिज्य संघका अध्यक्ष, पत्रकार र आयोजक कमिटिका सदस्यहरुको सहभागिता रहेको थियो ।
नेपालगन्जमा पहिलो पटक आयोजना गर्न लागिएको फुड लेन कार्यक्रम स्थानीय मौलिक परिकारलाई ब्रान्डिङ गर्ने उद्देश्यले विकसित भएको अवधारणा रहेको आयोजक नाटा बाँके च्याप्टर अध्यक्ष श्रीराम सिग्देलले बताए ।
नेपालगन्जका स्थानीय रैथाने परिकार, चाट, बिरयानी, पानी पुरी, हलुवा पराटा, घंमन्जा, इर्मती, सेकुवा लगायतका चर्चित परिकारलाई व्यवस्थित रुपमा राती करिब १२ बजे सम्म बिक्री गर्नका लागि खुला गरिनेछ । त्यसलाई व्यवस्थित र स्वास्थ्यको हिसाबले उपयुक्त परिकारहरु कसरी बनाउने भन्ने बारेमा पनि स्थानीय व्यवसायीलाई विशेषज्ञ टिमले सहजीकरण गर्नेछ ।

फुडलेनको अवधारणले नेपालगन्जमा आन्तरिक तथा बाह्य पर्यटकको संख्या बृद्धी गर्दै स्थानीय मौलिक परिकारलाई देशभर र विश्वबजार सम्म फैलाउने उद्देश्य राखिएको छ । आयोजक नाटा च्याप्टर बाँके अध्यक्ष सिग्देलले भने,‘हाम्रो उद्देश्य भनेको यहाँको मौलिक परिवार जुन चर्चित छन् । त्यसको स्वादले धेरै मानिसलाई मोहित बनाउँछ । त्यस्ता परिकारलाई हामीले देशभरमा चर्चित गराउन पर्छ । यसले यहाँको पहिचानसँगै आर्थिक प्रगतिमा पनि सघाउँछ । त्यसका लागि हामी एउटा योजना बनाएर त्यसलाई सुरुआत गर्ने तयारी गरेका छौं । यसमा सबैको साथ र सहयोग आवश्यक छ ।’

नेपालगन्ज उप–महानगरपालिका मेयर प्रशान्त विष्टले त्रिभुवन चोकको पहिचानसँगै यहाँको आर्थिक उन्नतीसँग फुड लेन कार्यक्रम जोडिएकोले यसलाई सफल बनाउन आफुले सक्दो सहयोग गर्ने बताए । उनले भने,‘यो एकदमै राम्रो योजना हो । समय अनुसार हामीले आफुलाई बदल्नु पर्छ । व्यापारमा पनि हामीले त्यसलाई अनुसरण गरेमा त्यसले राम्रो प्रतिफल दिन्छ । नगरको पहिचान बढाउन यस्ता कार्यक्रम महत्वपुर्ण छन् । यसलाई सफल बनाउन सबैले सहयोग गर्नु पर्छ ।’
फेड लेन आयोजक कमिटिका सदस्य एवम कालपृष्ठ दैनिकका संस्थापक हेमन्त कर्माचार्यले नेपालगन्जको पहिचानलाई जिवन्त राख्दै आर्थिक उन्नती गर्न यस्ता कार्यक्रमले टेवा पु¥याउने बताए । उनले भने, ‘यहाँका हरेक खाने कुरामा आफनै विशेषता छन् । जसले ग्राहकलाई वर्षौ सम्म आर्कर्षित गरिरहेका हुन्छ । तर विस्तारै ति कुराहरु हराउने डर छ । नयाँ पुस्तामाझ हाम्रो मौलिक परिकारको स्वाद र महत्वलाई लैजानका लागि पनि आवश्यक छ ।’
प्रयर्टन प्रवद्र्धन मंच बाँके अध्यक्ष कृष्ण प्रसाद श्रेष्ठले नेपालगन्जको पहिचानलाई जिवन्त राख्न फुड लेन कार्यक्रमले संघाउने बताए ।

………….

कार्यक्रममा नेपालगन्ज उप–महानगरपालिका वडा नम्बर ८ अध्यक्ष रजनीश वाजपेयी र ११ नम्बर वडा अध्यक्ष नन्द किशोर कश्यपले फुड लेन कार्यक्रमलाई सफल बनाउन वडाले सहकार्य गर्ने बताए । नेपालगन्ज उद्योग वाणिज्य संघका अध्यक्ष अब्दुल वाहिद मन्सुरी चुन्नाले फुड लेन कार्यक्रम नेपालगन्जको पहिचानसँग जोडिएकोले यसलाई उचित व्यवस्थापनमा सबैको सहयोग आवश्यक रहेको धारणा राखे । छलफल कार्यक्रममा फेड लेनको व्यवस्थापन, सुरक्षा व्यवस्था, फोहोर व्यवस्थापन र व्यवसायीलाई ऋणको व्यवस्था लगायतका विषयमा पनि छलफल गरिएको थियो ।