बबई नदिमा मृत भेटिएका पदमको मृत्यु शंकास्पद, घटनाको अनुसन्धान गर्न आफन्तको माग

कालपृष्ठ समाचारदाता
नेपालगन्ज, कात्तिक २० गते

बर्दिया–सुर्खेतको सिमानामा पर्ने बबई नदिमा मृत अवस्थामा भेटिएका पदम बस्नेतको मृत्यु शंकास्पद देखिएको आफन्तले बताएका छन् । गत कात्तिक १७ गते स्थानीय प्रहरीले बबई नदिमा करिब ३० वर्षिय पदमको शव फेला पारेको थियो ।

खजुरा गाउँपालिका वडा नम्बर २ निवासी पदमको ससुराली बर्दिया–सुर्खेत सिमानामा पर्ने बबईमा रहेको छ । नदिमा शव फेला परेपछि प्रहरी प्रहरीले घरमा खबर गरेका थिए ।

बाँसगढी नगरपालिका १ नम्बर वडा अध्यक्ष जयराज पाण्डेले घटनाको बारेमा आफुलाई जानकारी गराएको खजुरा गाउँपालिका वडा नम्बर २ अध्यक्ष धनराम वलीले बताउनु भयो । आफन्तहरु शव बुझन जाँदा अनुहारमा रगतको डाम देखेपछि आफन्तले शव बुझन अस्वीकार गरेका थिए । पदमको दाई पर्ने दिल बहादुर बस्नेतका अनुसार प्रहरीले घटनाको बारेमा राम्ररी अनुसन्धान नगरेर शव बुझन मात्र दबाब दिएको बताउनु भयो ।

उहाँले भन्नु भयो, ‘पदमको शव हेर्दा मृत्यु भन्दा कसैले मारेको जस्तो देखिन्छ । घटनाको बारेमा स्थानीयले पनि विभिन्न शंकास्पद कुराहरु गरिरहेका छन् । त्यसले हामीलाई शंका लागेर घटनाको यर्थात अनुसन्धान होस भन्ने हाम्रो माग हो ।’

कसैले मारेर फालेको हुन सक्ने आफुहरुको आंशका रहेको दिल बहादुरले बताउनु भयो । आफन्तहरु जादा प्रहरीले शव बाहिर निकालेर राखेको थियो । पदम केहि समय अघि भारतबाट कमाएर फर्किएका थिए । तीन वर्ष अघि पनि पदमलाई मार्ने प्रयास गरिएको आफन्तले बताएका छन् । मृतक पदमको शव अहिले छिन्चु अस्पतालमा राखिएको छ ।