कांग्रेस केन्द्रीय सदस्यमा पत्रकार कमला हमालको उम्मेदवारी घोषणा

कालपृष्ठ समाचारदाता
काठमाडौं, १७ असोज

नेपाल प्रेस युनियन केन्द्रीय सदस्य कमला हमालले नेपाली कांग्रेसको १५औं महाधिवेशनमा केन्द्रीय सदस्यमा उम्मेदवारी दिने घोषणा गरेकी छिन् । पत्रकारिता क्षेत्रमा स्थापित कमला हमालले नेपाली कांग्रेसको १५ औँ महाधिवेशनबाट ‘जेन–जी समूह’ अन्तर्गत केन्द्रीय सदस्यमा उम्मेदवारी दिने घोषणा गरेकी छन् । उनी बाँकेको संघीय निर्वाचन क्षेत्र नं. ३ बाट महाधिवेशन प्रतिनिधिमा निर्वाचित भएकी हुन् ।

पत्रकारिताको सक्रिय यात्रालाई उनले १४ औँ महाधिवेशनबाटै सीमित बनाउँदै आएकी थिइन् । ११ औँ महाधिवेशनबाट क्रियाशील सदस्य भएकी उनी १४ औँ महाधिवेशनमा २४ वर्षको उमेरमा महाधिवेशन प्रतिनिधि भएकी थिइन् । त्यसबेलै केन्द्रीय सदस्यका लागि उम्मेदवारी दिने तयारी गरेकी थिइन् । तर, अग्रजहरुले ‘बेला भएको छैन’ भनेपछि हतोत्साहित भएकी थिइन् ।

नेपाली कांग्रेसले विधान संशोधन गरेर केन्द्रीय समितिमा ‘जेन–जी उमेर समूह’ का २१ जनाको प्रतिनिधित्व सुनिश्चित गरेको छ । तर, ‘जेन–जी उमेर समूह’ को उमेरहद भने ३५ वर्ष पूरा नभएको हुनुपर्ने व्यवस्था छ । त्यसअनुसार सो उमेर समूहका प्रत्येक प्रदेशबाट एक महिला र एक पुरुष गरी दुई जना निर्वाचित हुने व्यवस्था छ ।