जन्मदिनमा कार्कीले गरे पुरस्कार स्थापना

नेपालगन्ज, २७ साउन (कालपृष्ठ)
नेपालगन्जका उद्योगी किरण कार्कीले जन्मदिनको अवसरमा पुरस्कार स्थापना गरेका छन् । नेपालगन्जबाट उत्पादन हुने आशिर्षद पेन्ट्स उद्योगका कार्यकारी अध्यक्ष कार्कीले आफ्नो जन्मदिनमा असल शासन किरण प्रतिभा पुरस्कार स्थापना गरेका हुनन् । हरेक वर्ष साउन २६ गते बाँकेलाई कर्मथलो बनाई कार्यरत एक जना पत्रकार, साहित्यकार, लेखकलाई ११ हजार एक सय ११ नगद राशी सहितको असल शासन किरण प्रतिभा पुरस्कार प्रदान गरिने उनले घोषणा गरेका हुन् ।
उक्त पुरस्कारको व्यवस्थापन असल शासन मिडियाले गर्ने बताइएको छ । पुरस्कारको स्थापनाका लागि कार्कीले १ लाख ५० हजारको पुरस्कार अक्षय कोष पनि स्थापना गरेका छन् । पुरस्कार स्थापना घोषणा कार्यक्रममा प्रबन्ध निर्देशक कार्कीले एक लाख ५० हजारको चेक असल शासन मिडियालाई उपलब्ध गराएका छन् ।