बाँकेमा एकजना वडाध्यक्षसहित ११ जनामात्रै नेकपा एसतिर

कालपृष्ठ समाचारदाता
नेपालगन्ज, २२ भाद्र
बाँकेका स्थानीय तहमा नेकपा एमालेबाट निर्वाचित ११ जना जनप्रतिनिधिले मात्रै माधव नेपाल नेतृत्वको नेकपा एकीकृत समाजवादी अर्थात् नेकपा एस रोजेका छन् । एमाले छोड्नेमध्ये एकजना वडाध्यक्ष छन भने अरु सबै वडासदस्य र कार्यपालिका सदस्यहरु रहेका छन् । बाँकेका आठ स्थानीय तहमध्ये तीन वटा स्थानीय तह खजुरा, जानकी बैजनाथमा अध्यक्ष र उपाध्यक्ष तथा कोहलपुर नगरपालिकामा मेयर एमालेका रहेका छन् । आठ वटा तहमा एक सय ५६ जना एमालेबाट जितेका जनप्रतिनिधि रहेकोमा ११ जनाले मात्रै नेकपा एस रोजेका छन् ।
नेकपा एस रोज्ने वडाध्यक्ष बैजनाथ गाउँपालिका-४ का वडाध्यक्ष कालीबहादुर सिंह रहेका छन् । उनले मंगलबार जिल्ला निर्वाचन कार्यालय, नेपालगन्जमा पुगेर एकीकृत समाजवादी रोजेका हुन् ।
नेपालगन्ज उप-महानगरपालिकाबाट नेपका एस रोज्नेहरुमा नेपालगन्ज उप-महानगरपालिका वडा नम्बर १ का सदस्य डम्बर थापा मात्रै रहेका छन् । यसैगरी खजुरा गाउँपालिकाबाट ४ जनाले एमाले छाडेर नेकपा एस रोजेका छन् । उनीहरु वडा नम्बर ६ का सदस्य हजुरा बम, खजुरा-२ का सदस्य नन्दलाल गुर्ताल, खजुरा-१ का रामबहादुर शाही र देउप्रसाद बुढा रहेका छन् । कोहलपुर नगरपालिकाबाट ३ जनाले एमाले छाडेका छन् । कोहलपुर-५ का वडासदस्य शंकर खड्का, कोहलपुर-६ का फग्गु थारु, कोहलपुर-११ का हरिकला सुनार नेकपा एसतिर लागेका छन् । बैजनाथ गाउँपालिका-४ का वडाध्यक्ष सिंह, जानकी गाउँपालिकाका कार्यपालिका सदस्य टीकाराम सुनारले पनि नेकपा एस रोजेका नेकपा एकीकृत समाजवादी बाँकेका नेता अशोक कोइरालाले जानकारी दिए ।
राप्तीसोनारी, डुडुवा र नरैनापुरका कुनैपनि जनप्रतिनिधिले एमाले छोडेनन् । निर्वाचन आयोगले दल छान्न २२ भदौसम्मको समय दिएको थियो । नेता कोइरालाले अरु केही साथीहरु आउने तयारी गरेपनि रातारात परिवर्तन भएको दावी गरेका छन् ।
कोइराला एमाले र माओवादी केन्द्रको पार्टी एकता हुनुअघि एमाले जिल्ला अध्यक्ष थिए । उनले एमाले फुटेपछि नेकपा एस रोजेका हुन् । कोइरालाले नेकपा एस रोजेपनि जनप्रतिनिधिको सानो संख्यामात्रै नेकपा एसतर्फ लागेको छ । बाँकेमा संघका एकजना र प्रदेशका दुई जना सांसदले पनि एमाले छाडेनन् ।