भेरी अस्पताल घटना प्रकरणः समितिले बुझाउन सकेन प्रतिवेदन

वीरेन्द्र जैसी
नेपालगन्ज, २२ भाद्र
भेरी अस्पतालले मृत शिशुको हातमा अर्कै आमाको ट्याग लगाइदिएको घटनाबारे छानबिन गर्न गठित समितीले समयमै काम सम्पन्न गर्न असफल भएको छ । ७ दिनभित्र घटनाबारे छानबिन गरी प्रतिवेदन बुझाउन जिल्ला प्रशासन बाँकेले भदौ ११ गते पाँच सदस्यीय छानबिन समिती गठन गरेको थियो । गठन भएको १२ दिन बितिसक्दा पनि समितीले अस्पताल प्रशासन र स्वास्थ्यर्कीसँग सोधपुछ पनि गरेको छैन ।
समितीका संयोजक बाल रोग विशेषज्ञ डा. रोमा बोराले हालसम्म पीडित पक्षसँग सोधपुछ गर्ने काम मात्रै भएको जानकारी दिइन् । डा. बोराले भनिन्, ‘अहिलेसम्म हामीले पीडितहरुसँग घटनाबारे सोधपुछ गरेका छौँ । अब अस्पताल प्रशासन र स्वास्थ्यकर्मीसँग सोधपुछ गर्दै छौँ ।’

उनले स्वास्थ्यकर्मी र अस्पाल प्रशासनसँग छलफल गरेर पुनः पीडित र अस्पताल पक्ष दुवैलाई एकैठाउँ राखेर छलफल गर्ने बताइन् । ७ दिन समय दिइएको समितिको म्याद सएिको पाँच दिन भइसक्दा पनि प्रशासनले म्याद थपेको छैन । संयोजक डा. बोराले बुधबार अपरान्ह कालपृष्ठसँग कुरा गर्दै भनिन्, ‘म्याद थपिएको छैन । आज थप्नलाई रिक्वेस्ट गर्ने भनेका थियौँ । के भयो बुझ्न पाएको छैन ।’
बाँकेका सहायक प्रमुख जिल्ला अधिकारी एवं कार्यालयका सूचना अधिकारी दीर्घराज उपाध्यायले समितिले म्याद थप गरे-नगरेको विषयमा अनभिज्ञता प्रकट गरे ।

अर्का सहायक प्रमुख जिल्ला अधिकारी संकरबहादुर विष्टले अहिलेसम्म समितीका कोहीपनि व्यक्ति म्याद थपका लागि नआएको बताए । ‘म्याद थप गर्नका लागि समितिले करणसहित निवेदन दिनुपर्छ । त्यसपछि प्रशासनले म्याद थप गर्छ,’ विष्टले भने ।
सहायक प्रमुख जिल्ला अधिकारी विष्टले समितीले जसरी पनि घटनाबारे सत्यतथ्य सार्वजनिक गर्नुपर्ने बताएका छन् ।

‘यो समितीले बुझाउने प्रतिवेदनले घटनाबारे मात्रै नभई प्रसुती गृहमा भएका कमीकमजोरी र सुधार गर्नुपर्ने कुरा पनि बाहिर ल्याउँछ । त्यसले अस्पतालप्रति विश्वसनीयता बढाउँछ भने सेवा सुधारमा पनि भूमिका खेल्छ,’ विष्टले भने । उनले यसो भनिरहँदा प्रशासनले पनि समितीबारे चासो नराखेको प्रष्ट भएको छ ।
गत भदौ ९ गते खजुरा गाउँपालिका-६ की २० वर्षीया चन्द्रा विक जन्माएको शिशुु भेरी अस्पतालको एनआइसियुमा मृत्यु भएको थियो । मृत्यु भएका शिशुुको हातमा अस्पतालका कर्मचारीले दुईवटा आमाको ट्याग लगाइदिएका थिए । परिवारले शिशुुको अन्तिम संस्कार गर्न लाग्दा हातमा अर्कैको ट्याग देखेपछि आशंका उत्पन्न भई उनीहरुले बालकलाई खाडलबाट निकालेर खजुबाट पुनः अस्पताल ल्याएका थिए ।

९ गते राती अस्पतालमा तनाव उत्पन्न भएको थियो । १० गते अस्पताल प्रशासन र पीडित पक्षबिच भएको वार्तामा घटनाबारे छानबिन गर्न समिति गठन गर्न जिल्ला प्रशासनलाई अनुरोध गर्ने निणर्य भएको थियो । त्यसको पछिल्लो दिन जिल्ला प्रशासन कार्यालयले डा. बोराको संयोजकत्वमा समिति पाँच सदस्यीय समिती गठन गरेर ७ दिनभित्र घटना घट्नुको कारण, सेवा प्रवाहमा भएका कमिकमजोरी र सुधार गर्नुपर्ने कुरासहितको प्रतिवेदन तयार गरि बुझाउन निर्देशन दिएको थियो ।

साथै, उपचारमा लापबाही भएको वा बच्चा साटिएको पाइएमा दोषीलाई कानुनी कारबाही गरिने सहमति भएको थियो । समितिमा जिल्ला स्वास्थ्य कार्यालयका अधिकृत नरेश श्रेष्ठ, जिल्ला प्रशासन कार्यालयका प्रशासकीय अधिकृत हरिश्चन्द्र शर्मा, अधिवक्ता वसन्त गौतम र प्रहरी निरीक्षक इश्वरदेव गिरी सदस्य रहेका छन् ।
तर, अहिलेसम्म शिशुु र उनका मातापीतको डिएनए टेस्टका लागि नमुना संकलन गरेर ल्याबमा पठाउनेबाहेक अर काम हुन सकेको छैन । गठित समिती पनि गैर जिम्मेवार बनेपछि दोषीलाई कारबाही हुने र सत्यतथ्य बारि आउनेमा आशंक उत्पन्न भएको छ । मृतक शिशुुका पिता गोविन्द विक आफूले आगामी दिनमा अपतालमा लापरबाहीका घटना नदोहोरिउन् भनेर छानबिनको माग गरेपनि गठित समितीले सत्यतथ्य बाहिर आउनेमा आशंका व्यक्त गरेका छन् । समिती गैरजिम्मेवार बनेको उनको आशंका छ । ‘मेरा लागि मात्रै नभएपनि अस्पतालको विश्वसनीयता सेवाको प्रभावकारिताका लागि सत्यतथ्य सार्वजनिक हुनु आवश्यक छ,’ गोविन्दले भने ।

किन हुन्छ भेरीको लेवर वार्डमा लापरबाही ?

भेरी अस्पतालले मृत शिशुको हातमा अर्कैको ट्याग लगाइदिएपछि……