साझा सवालमा राजनीतिक उदासिनता रहेको गुनासो

विष्णुप्रसाद देवकोटा
डोल्पा, १३ असोज
हिमाली जिल्ला डोल्पामा राजनीतिकदलहरुको उदासिनताका कारण विकास निर्माण तथा सामाजिक सरोकारका क्षेत्रहरुमा वेतिथि बढ्दै गइरहेकोे एक कार्यक्रमका सहभागिले बताएका छन् । सदरमुकाम दुनैमा आयोजित समाज रुपान्तरणको लागि नागरिक समाजको भूमिका एवं सन्जाल गठन सम्बन्धमा गरिएको कार्यशाला गोष्ठीका सहभागिले उक्त कुरा बताएका हुन् ।

सामाजिक जागरण केन्द्रको आयोजना तथा प्लान नेपाल र युरोपियन युनियनको आर्थिक सहयोगमा कार्यक्रम आयोजना गरिएको हो ।
जिल्लामा सुशासन र पारदर्सिता एवं सरकारका कमजोरीमा खबरदारी गर्नका लागि नागरिक समाज डोल्पाले खेल्दै आएको भूमिका यसको आवश्यकता महत्व र आगामी दिनमा साभा मुद्दाहरुलाई के कसरी उठान गर्न सकिन्छ ? भन्ने समन्वयात्मक भूमिकाको बारेमा छलफल गराइएको थियो ।

जिल्लास्तरीय गैहसरकारी संघ-संस्थाका प्रतिनिधि नागरिक समाज, पत्रकार र मानवअधिकारकर्मीहरुको सहभागिता रहेको कार्यक्रममा नागरिक समाज डोल्पाका अध्यक्ष शेरबहादुर बुढाले नागरिक समाज एक मुनाफारहित संस्था भएकाले यसमा स्वस्फुर्तरुपमा सहभागी भई समाज रुपान्तरणको लागि अगाडि बढ्नु पर्ने बताए । उनले जिल्लाका हरेक सामाजिक सवालहरुको उठान गर्दा पनि राजनीतिक दलहरुको वेवास्ताले गर्दा कतिपय साझा सरोकारका मुद्दाहरु ओझेलमा पर्दै आइरहेको बताए ।

नेपाल पत्रकार महासंघका जिल्ला पूर्वअध्यक्ष विष्णुलाल बुढाले विगतमा नागरिक समाजले जिल्लाका साझा मुद्दाहरुमा सशक्त आवाज उठाउँदै आइरहेको बताए । उनले कोभिड-१९ ले गर्दा झण्डै दुई वर्षसम्म सक्रियरुपमा मुद्दाहरु उठान गर्न नसकिएको बताउँदै गलत मनसायबाट जिल्ला अस्पताल दुनैको भवन निर्माणको लागि बनाइएको डिपिआर परिवर्तनदेखि खबरदारी सम्मको कार्य गर्न गराउन सफल भएको बताए ।

आयोजक संस्था समाज जागरण केन्द्रका कार्यक्रम संयोजक कणर् भण्डारीले नागरिक संघ-सस्थाको संस्थागत लेखाजोखा, सचिवालयको भूमिका र एकीकृत भएर साझासवाल उठानमा सबैको हातेमालोका लागि नागरिक समाजसँगको आबद्धता संख्या बढाउनु पर्ने बताए ।

यसैगरी नागरिक समाजको अगुवाइमा उठान गरिएका जल्दाबल्दा सवालको स्थानीय, प्रदेश र संघीय सरकारले गम्भीरतापूर्वक लिएर कार्यान्वयन गर्नुपर्ने कार्यक्रमका सहभागिहरुले जोड दिए ।