प्रहरी महानिरीक्षकमा जयबहादुर चन्द र सशस्त्र प्रहरी महानिरीक्षकमा सिंहबहादुर श्रेष्ठ नियुक्त

काठमाडौं – सरकारले प्रहरी महानिरीक्षकमा जयबहादुर चन्द र सशस्त्र प्रहरी महानिरीक्षकमा सिंहबहादुर श्रेष्ठलाई नियुक्त गरेको छ ।

आइतबार बसेको मन्त्रीपरिषद बैठकले गृहमन्त्री विमलेन्द्र निधीको प्रस्तावमा चन्दलाई प्रहरी महानिरीक्षक र सिंहलाई सशस्त्र प्रहरीको महानिरीक्षक बनाउने निर्णय गरेको हो ।

दिउँसो ४ बजे बस्ने तय भएपनि मन्त्रीपरिषदको बैठक आकस्मिक रुपमा बिहानै बसेको हो । गृह मन्त्रालयको उच्च श्रोतका अनुसार आइतबार सरकारी कार्यालय खुल्नासाथ सर्वोच्चले चन्दलाई तत्काल महानिरीक्षक नबनाउन अन्तरिम आदेश दिनसक्ने भएपछि १० बजे पहिल्यै मन्त्रीपरिषदको बैठक बसेको हो । यसविषयमा प्रधानमन्त्री पुष्पकमल दाहाल र गृहमन्त्री विमलेन्द्र निधीबिच शनिबार छलफल भएको थियो ।

सरकारले तेश्रो बरियतामा रहेका प्रहरी नायव महानिरीक्षक जयबहादुर चन्दलाई प्रहरी महानिरीक्षक बनाएको छ । यो विधि विपपरित हुने भन्दै अधिवक्ता कपिलदेव ढकालले सर्वोच्चमा शुक्रबार रिट दायर गर्नुभएको थियो ।

आइतबार सरकारी कार्यालय खुल्नासाथ सर्वोच्चले यसबारे अन्तरिम आदेशको डरले बिहानै मन्त्रीपरिषद बैठक डाकिएको श्रोतको दाबी छ ।