डुडुवामा ७०० मेटिक टनको अत्याधुनिक सितभण्डार बन्ने

कालपृष्ठ समाचारदाता
नेपालगन्ज, १५ मंसिर
बाँके जिल्लामा आलु उत्पदानका लागि प्रसिद्ध डुडुवा गाउँपालिकाको हिरमिनियामा सात सय मेट्रिक टन क्षमताको सितभण्डार (कोल्ड स्टोरेज) बन्ने भएको छ । डुडुवा गाउँपालिकाले यसलाई सबैभन्दा ठुलो योजनामध्ये एक भनेको छ ।

डुडुवा ६ हिरिमिनियामा निमाणर् थालिएको ७०० मेट्रिक टन क्षमताको अत्याधुनिक कोल्ड स्टोरेजको मंगलबार एक कार्यक्रमकाबीच गाउँपालिका अध्यक्ष नरेन्द्रकुमार चौधरीले शिलान्यास गरे ।

शिलान्यास गर्दै गाउँपालिका अध्यक्ष चौधरीले आलुको पकेट क्षेत्र मानिएको हिरिमिनियाका किसानले उत्पादन गरेको तरकारी तथा फलफुल भण्डारणमा सहयोग पुर्‍याउने उदेश्यले कोल्ड स्ठटोर बनाउन लागिएको बताए ।

उनले आलु लगायतका तरकारी र फलफुल भण्डारण गर्नका लागि डुडुवाका किसानलाई विशेष फाइदा भएपछि कृषि उत्पादनमा बृद्धि तथा बजारीकरणको सम्भावना अझै बढने अपेक्षा गरिएको बताए ।

अध्यक्ष चौधरीले गाउँपालिकाको दोस्रो वर्षको योजनामा परेको यो योजनालाई अहिले कार्यन्वयनमा ल्याउदा किसानका समस्या समाधान हुनेमा विश्वास व्यक्त गरे ।

करिब १३ कठ्ठा जग्गामा निर्माण हुन लागेको अत्याधुनिक प्रविधिसहित बुउदेश्यीय भण्डारको लागत ६ करोड ७ लाख ५४ हजार दुई सय १२ रुपैयाँ हुने जानकारी दिइएको छ ।

गाउँपालिकाको यसवर्षको बजेटमा प्रदेश सरकारको नगद अनुदानमा प्राप्त ७५ लाख रुपैयाँ कोल्ड स्टोरका लागि विनियोजन गरिएको छ । योजनालाई बहुवर्षीय आयोजनाकारुपमा अघि बढाइएको गाउँपालिकाका प्रमुख प्रशासकीय अधिकृत परशुराम उपाध्यायले जानकारी दिए ।

कोल्ड स्टोरेजसँगै प्रशासनिक कार्यालय भवन, गेष्ट हाउस, शौचालय, वाउण्ड्री वाल, पार्किङको निमाणर् गरिने गाउँपालिकाका इन्जिनियर प्रकाश शाहीले बताए ।

कोल्डस्टोरेजको निमाणर्पछि गाउँपालिकाका किसानसंगै जिल्लाका अन्य किसानलाई पनि राहत मिल्ने अपेक्षा गरिएको छ । १८ महिनाको अवधीमा निर्माण सम्पन्न गर्ने लक्ष्य राखिएको छ । निर्माणको जिम्मा काठमाण्डौस्थित पारामाउण्ट नेचुरल जेवी निर्माण कम्पनीले लिएको इन्जिनियर सुरेन्द्र बर्माले बताए ।

उनका अनुसार ६ महिना लगाएर योजनाको अत्याधुनिक डिपीआर तयार गरिएको हो ।

गाउँपालिकाले पहिलो ठूलो भौतिक निर्माणको योजना भनेको गाउँपालिकाको प्रशासनिक भवन पछि दोस्रो ठूलो योजना सितभण्डारको रहेको बताएको छ । गाउँपालिका भवन अहिले निमाणर्धिन रहेको र हालसम्म करिब ८० प्रतिशत निमाणर् सकिएको जनाइएको छ ।