बाँकेमा सरकारले २५ हजार क्वीन्टल धान खरिद गर्ने

कालपृष्ठ समाचारदाता
नेपालगन्ज, १६ मंसिर
खाद्य व्यवस्था तथा व्यापार कम्पनी लिमिटेड मुख्य शाखा कार्यालय नेपालगन्जले यसवर्ष बाँकेमा २५ हजार क्विन्टल धान खरिद गर्ने भएको छ । शाखा कार्यालयलाई कम्पनीको केन्द्रले मोटा धान ५ हजार क्वीन्टल र मध्यम धान २० हजार क्वीन्टल खरिद गर्नेगरी परिपत्र पठाएको छ । केन्द्रबाट परिपत्र नआउँदा ढिलाई भएको धान खरिदको तयारी सुरु गरिएको मुख्य शाखा अधिकृत रामबहादुर विष्टले जानकारी दिए ।

केन्द्रबाट बिहीबार परिपत्र आएपछि धान खरिदको तयारी सुरु गरेको उनले बताए । अब प्रमुख जिल्ला अधिकारी नेतृत्वको समितिमा छलफल गरेर धान खरिद सुरु गरिने छ ।

कम्पनीका अनुसार धान खरिदका लागि किसानले अझै एक हप्ता कुर्नुपर्नेछ । धान खरिदका लागि कस्तो विधि अपनाउने ? भन्ने विषयमा निक्र्यौल गरेर सूचना जारी गरिसेकेको एक हप्तापछि धान खरिद सुरु हुने कार्यालयको भनाइ छ । त्यसका लागि शुक्रबार समितिको बैठक बस्दै छ ।

कृषि तथा पशुपक्षी मन्त्रालयले गत भदौ २९ गते नै चालु आर्थिक वर्ष २०७८/७९ का लागि धानको समर्थन मूल्य तोकेको थियो । सरकारले तोकेको मोटा धानको न्यूनतम समर्थन मूल्य प्रति क्वीन्टल दुई हजार सात सय ५२ रुपैयाँ हो भने मध्यम धानको न्यूनतम समर्थन मूल्य दुई हजार नौ सय २ रुपैयाँ छ । धानको मूल्य तोकिएपनि हालसम्म धान खरिदको प्रकृया सुरु भएको छैन ।
यसवर्ष तोकिएको कोटा गतवर्ष खरिद गरिएको भन्दा झण्डै २२ हजार क्वीन्टल कम हो । नेपालगञ्ज शाखाले गतवर्ष ४७ हजार ८ सय क्वीन्टल धान खरिद गरेको थियो ।

गतवर्ष मंसिर ८ गतेबाट धान खरिद सुरु गरिएको थियो । धान खरिद सुरु गरेपनि यसवर्ष अधिकांश किसान धानको गुणस्तरका कारण समस्यामा पर्ने भएका छन् । खाद्य व्यवस्था तथा व्यापार कम्पनी लिमिटेडले सिस्यान नभएको र उच्च गुणस्तरको धान मात्रै खरिद गर्ने गरेको छ । ‘हामीले धान खरिद गरेर चामल बनाई उपभोक्तालाई बेच्ने हो । त्यसका लागि धानको गुणस्तर तोकिएको छ । त्यसअनुसार भएन भने हामीले खरिद गर्न पाउँदैनौ,’ विष्टले भने ।

तर, यसवर्ष अधिकांश धान भिजेर बिग्रेको छ । भिजेर बिग्रेको धान लिएर आएमा किसानहरुले कष्टमात्रै भोग्नुपर्ने जोखिम छ । खरिदका लागि परिपत्र आएमा सुकेको तथा भुस नभएको अनि सफा धान मात्र खरिद गर्न ल्याउन अनुरोध गरिने विष्टले बताएका छन् ।