लुम्बिनी प्रदेश पूर्वाधार प्राधिकरण प्रमुख घिमिरेलाई ज्यान मार्ने धम्की

लिलाधर वली

दाङ, १८ मंसिर 
अस्थायी मुकाम बुटवलबाट लुम्बिनी प्रदेशको राजधानी सार्न थालेको भन्दै लुम्बिनी प्रदेश पूर्वाधार विकास प्राधिकरणका प्रमुख कार्यकारी अधिकृत अनन्तराज घिमिरेलाई ज्यान मार्ने धम्की आएको छ ।

धम्की

स्थायी राजधानीमा भौतिक पूर्वाधारको कामलाई निरन्तर जारी राखेर राजधानी सार्न थालेको भन्दै सामाजिक सञ्जाल फेसबुक म्यासेन्जरमार्फत घिमिरेलाई ज्यान मार्ने धम्की दिइएको हो । सुबोध बेलबासे नामको फेसबुक म्यासेन्जरमार्फत पठाइएको म्यासेजमा राजधानीको काम तुरुन्त रोक्न धम्की दिइएको छ । ‘राजधानी सार्ने नै हो त ? काम छैन पागल जस्तै गरेको छ,’ घिमिरेलाई पठाइएको म्यासेजमा भनिएको छ, ‘अर्थले बजेट रोकिसक्यो, ठेकेदार काम रोक्न तयार छ, सिईओलाई मर्न मन छ के हो ?’ उक्त म्यासेजमा अख्तियार लगाएर या ज्यान मारेर सिध्याउने धम्की दिइएको छ । राजधानीमा भौतिक पूर्वाधार निर्माणको काम तत्काल रोक्न पनि धम्की दिइएको छ । म्यासेजमा लेखिएको छ,‘नत्र बुटवल आएपछि दाङ फर्कन पाउँदैनस् ।’

आफ्नो चार सय करोड रुपैयाँ लगानी सिध्याउन खोजेको भन्दै म्यासेजमा सम्झाउँदा पनि नमानेको उल्लेख गरिएको छ । राधजानीको काम सुस्त गर्न सम्झाएको विषयमा घिमिरेले आफूलाई अप्रत्यक्षरूपमा त्यस्ता खालका सुझावहरू आएपनि आफुले जिम्मेवारीअनुसार काम गरिरहेको बताए ।

घिमिरेकाअनुसार दाङमा राजधानी आउन नदिने नियत बोकेकाहरूबाटै धम्की आएको आशंका गरिएको छ । आफूमाथि असुरक्षा भएको भन्दै प्राधिकरणका सिईओ घिमिरेले सुरक्षा माग गर्दै जिल्ला प्रशासन कार्यालयमा जानकारी गराएको बताए । ‘मलाई राम्रोसँग चिनेको र राजधानीको विषयमा चासो र सरोकार राख्ने मान्छेबाट नै यो खालको धम्की आएको हो,’ घिमिरले भने, ‘मैले धम्की दिने व्यक्ति पत्ता लगाउनका लागि सिडिओ र एसपी सापसँग जानकारी गराएको छु ।’ जिल्ला प्रहरी कार्यालय दाङका प्रहरी प्रमुख सुरेन्द्र काफ्लेले प्राधिकरणका प्रमुख कार्यकारी अधिकृत घिमिरेमाथि आएको धम्कीबारे अनुसन्धन सुरु भएको भन्दै छिट्टै दोषीलाई पक्राउ गर्ने बताए । ‘प्रहरीले जानकारी पाउनासाथ अनुसन्धान गर्न थालिसकेका छौ’,उनले भने,‘छिट्टै दोषीलाई पक्राउ गर्ने छौ ।’