भेरी अस्पताल परिसरमा अवस्थित स्टोरको क्वार्टरमा सुतेका चारजनाको मृत्यु (अपडेट)

भेरी अस्पताल परिसरमा अवस्थित कर्णाली प्रदेश सरकार अन्तर्गतको क्षेत्रिय मेडिकल स्टोरमा कार्यरत एक कर्मचारीको परिवारका चार जनाको सुतेकै अवस्थामा मृतु भएको छ । स्टोरको क्वार्टरमा बसेका उनीहरुको निसास्सिएर मृत्यु भएको आशंका गरिएको छ । यद्धपि यकिन कारण भने पोष्र्टमार्टमपछि मात्रै खुल्नेछ । स्टोर शाखामा कार्यरत धनप्रसाद भट्टराईसहित उनका छोरा, आमा र दिदीको मृत्यु भएको बाँके प्रहरीले जनाएको छ ।

कालिकोट खडाचक्र नगरपालिका ६ निवासी २३ वर्षीय धनप्रसादसँगै उनका तीन महिने छोरा इप्सन, ४५ वर्षीया आमा कोकिला र २७ वर्षीया दिदी नन्दकलीको मृत्यु भएको हो । यस्तै उनका २४ वर्षीया श्रीमति सुशिला, तीन वर्षीय छोरा *दिवस र १८ वर्षिय भाइ नरेन्द्रको अवस्था गम्भीर छ । उनीहरुको भेरी अस्पतालमा उपचार भइरहेको छ । उनीहरु क्वार्टरको एउटै कोठामा सुतेका थिए ।

घटनाबारे बिहीबार बिहान मात्र थाहा भएको बाँकेका प्रमुख जिल्ला अधिकारी सूर्यबहादुर खत्रीले जानकारी दिए । उनका अनुसार राती टिनमा आगो बालेर सुतेको पाइएकोले उनीहरुको निसास्सिएर मृत्यु भएको हुनसक्ने अनुमान गरिएको छ । मृतकहरुको मुखबाट फिज पनि निस्केको पाइएको छ । यकिन कारणबारे भने पोष्टमार्टम रिपोर्ट प्राप्त भइसकेपछि मात्रै थाहा हुने प्रजिअ खत्रीले बताए ।

धनप्रसाद विगत तीन वर्षदेखि स्टोर शाखामा कार्यरत रहेको बताइएको छ । परिवारका अन्य सदस्यहरु भेटघाटका लागि कालिकोटबाट आएकाले घटनामा एउटै परिवार परेको हुन सक्ने अनुमान गरिएको छ । यसअघिको समाचारमा स्टोर कक्षमा मृत्यु भएको भनेर उल्लेख भएकोमा सच्याइएको छ ।

*सच्याइएको