तलब नपाएपछि मेडिकल कलेजका कर्मचारी आन्दोलित

नेपालगन्ज मेडिकल कलेजका कर्मचारी पुनः आन्दोलनमा उत्रिएका छन् । मेडिकल कलेजमा कार्यरत चिकित्सकहरुले तलब नपाएको भन्दै आन्दोलित भएका हुन् ।

पाँच महिनादेखिको तबलभत्ता नपाएपछि चिकित्सकहरु बिहीबारबाट आन्दोलनमा उत्रिएका छन् ।

मेडिकल कलेजमा कार्यरत १ सय ५० भन्दा बढी चिकित्सक तत्काल तलबभत्ता निकासा गर्नुपर्ने माग गर्दै आन्दोलनमा उत्रिएका हुन् । उनीहरुले बिहीबार बिहान ९ बजेदेखि १० बजेसम्म मेडिकल कलेज प्रशासन अगाडि हातमा कालोपट्टी बाँधेर विरोध प्रदर्शन गरेका छन् ।

माघदेखिको तलब र इन्सेन्टीभ नपाएपछि ११ जेठमा बसेको मेडिकल कलेजका सम्पूर्ण फ्याकल्टीहरुको भेलाले ०७८ चैतसम्मको तलब १३ जेठसम्म भुक्तानी दिन अल्टीमेटम दिने निर्णय गरेको थियो ।

त्यसका लागि दबाब दिन १२ जेठ र १३ जेठमा अस्पताल प्रशासन अगाडि भेला भएर कालोपट्टी बाँधेर प्रदर्शन गर्ने निर्णय गरेको थियो । सोही निर्णयअनुसार बिहीबार चिकित्सकहरुले हातमा कालोपट्टी बाँधेर प्रदर्शन गरेका हुन् ।

प्रशासनले यसलाई गम्भीर रुपमा लिएर तलब भुक्तानी नगरे १६ र १७ जेठमा दिउँसो दुई बजेपछि सञ्चालन हुने ओपीडी सञ्चालनमा असहयोग गर्ने निर्णय पनि उनीहरुको भेलाले गरेको छ ।

नेपालगन्ज मेडिकल कलेजको फ्याकल्टी वेलफेयर काउन्सिल तदर्थ समितिका अध्यक्ष डा. विनोद महासेठकाअनुसार मेडिकल अधिकृतदेखि प्रोफेसरहरु गरी झण्डै १ सय ५० जना बढीले माघदेखि तलबभत्ता पाएका छैनन् ।

यस्तै, चिकित्सकहरुले ९—१० महिनादेखि इन्सेन्टीभ समेत पाएका छैनन् । डा. महासेठले यस विषयमा स्थानीय प्रशासनलाई पनि जानकारी गराएको बताए । ‘

उनले आफूहरु समाजको वौद्धिक वर्ग भएकाले यो समस्या साधान गर्न मेडिकल कलेज प्रशासनले नै बढी ध्यान दिनुपर्नेमा जोड दिए ।