पूर्वाधार निर्माणमा राप्ती सोनारीको फड्को

बाँकेको राप्ती सोनारी गाउँपालिका प्राकृतिक स्रोत साधनले भरिपूणर् स्थानीय तह हो । भौगोलिक क्षेत्रफलका हिसाबले बाँकेको सबैभन्दा ठूलो गाउँपालिका राप्ती सोनारीको दुःखद पक्ष थियो विकासका पूर्वाधारका हिसाबले पछि पर्नु ।

२०७४ सालमा भएको स्थानीय तहको निर्वाचनपछि राप्ती सोनारी गाउँपालिकामा भौतिक पूर्वाधारको विकासले तीव्रता त पायो नै, समाजिक विकासमा पनि उल्लेखनीय कामहरु भए । स्थानीय सरकारको पहिलो ५ वर्षमा सडक, शिक्षा, स्वास्थ्य, कृषिलगायतका क्षेत्रमा गाउँपालिकालेमुख्य प्राथमिकता दिएको छ । विकास निर्माण तथा भौतिक पूर्वाधारका काम तीव्ररुपमा भइरहँदा विद्यालयको पहुँचमा नपुगेका बालबालिका, स्वास्थ्य सेवाको पहुँचबाट वञ्चित हुनुपर्ने समस्याहरू समाधान भएका छन् ।

क्षेत्रफलको हिसाबले ठूलो पालिका भएका कारण राप्ती रोनारीलाई पालिकामा भौतिक पूर्वाधार निर्माण गर्नु चुनौतिको काम रह्यो । यद्यपी राप्ती सोनारीले आवश्यकताका आधारमा पालिकाको स्वास्थ, शिक्षा, कृषि, बाटोघाटो, मठमन्दिरलगायतका क्षेत्रहरुमा गरेको भौतिक पूर्वाधार निर्माणकोे परिणाम सन्तोषजनक नै रहेको पाइन्छ ।

पालिकाका निवर्तमान अध्यक्ष लाहुराम थारु पालिकाले पूर्वाधार निर्माणलाई प्राथमिकता दिएका कारण भौतिक निर्माणका कामहरु धेरै भएको बताउँछन् । त्यस्तै पालिकाका अध्यक्ष तप्त पौडेलले राप्ती सोनारीले विगत ५ वर्षमा भौतिक पूर्वाधार निर्माणलाई बढी प्राथमिकता दिएको अन्य शाखाका प्रमुखहरुले गुनासो गर्ने गरेको समेत बताए । उनले पूर्वाधारलाई बढी जोड दिएकै कारण पालिकामा सडक तथा भवन बनाउने काम बढी भएको बताए ।

राप्ती सोनारीको आर्थिक वर्ष २०७४/७५ देखि आर्थिक वर्ष ७७/०७८ सम्मको कामको मूल्यांकन गर्ने हो भने राप्ती सोनारीमा सबैभन्दा बढी बाटो घाटो निर्माण तथा मर्मत एवम् नयाँ बाटो खोल्ने काम भएको छ । भने विद्यालयको भवन बनाउने, स्वास्थ्य चौकीको भवन बनाउने, नाली निर्माण, पुल निर्माणलगायतमा धेरै बजेट खर्च भएको पाइन्छ ।

राप्ती सोनारीको आर्थिक वर्ष २०७४/०७५ मा कूल चालू बजेट २६ करोड २४ लाख ३८ हजार ४० रुपैयाँ रहँदा पालिकाले पूर्वाधार विकास शिर्षकमा मात्रै १६ करोड १७ लाख १८ हजार २ सय रुपैयाँ विनियोजना गरेको थियो ।

त्यस्तै आर्थिक वर्ष २०७५/०७६ मा प्रस्तुत ६९ करोड ५२ लाख ४५ हजार खर्चमा १९ करोड २४ लाख ६९ हजार, आर्थिक वर्ष २०७६/०७७मा कूल बजेट ७६ करोड ८ लाख ३९ हजारमा पूर्वाधार विकासमा २१ करोड १५ लाख रुपैयाँ, आर्थिक वर्षमा २०७७/०७८ मा७६ करोड ८ लाख ३९ हजारमा पूर्वाधार विकासका लागि १६ करोड ५८ लाख ८० हजार विनियोजना गरिएको थियो ।

साथै आर्थिक वर्ष २०७८/०७९ मा पनि पूर्वाधार विकासका लागि २२ करोड १५ लाख विनियोजना गरिएको छ ।

वडा नम्बर १ मा १८ किलोमिटर ग्राभेल

राप्ती सोनारी गाउँपालिकाको वडा नम्बर १ मा आर्थिक वर्ष २०७७/०७८ सम्म १८ किलोमिटर बाटोलाई स्तरोन्नति गर्न ग्राभेल तथा माटो पटान कार्य सम्पन्न भई सकेको छ । त्यस्तै १.५ किलोमिटर नयाँ ट्रयाक खोल्ने र ६० मिटर पीसीसी बाटो निर्माण गरिएको छ ।

त्यसैगरी १.३ किलोमिटर नाली निर्माण, ३० स्थानमा कल्भर्ट निर्माण १ स्थानामा पुल निर्माण र ३ स्थानमा झोलुंगे पुल निर्माण कार्य सम्पन्न भई सकेको पालिकाका योजना शाखा प्रमुख बालानन्द पौडेलले जनाकारी दिए ।

यसका अलवा वडा १ को ६ वटा मन्दिरमा भवन निर्माण तथा २ वटा मस्जितको भवन मर्मत, ३ विद्यालयका भवन निर्माण, अन्य संघ-संस्थाका ५ भवन निर्माण, १४ वटा खानेपानी टंकीर २ किलोमिटर विद्युतिकरण भई सकेको छ ।

त्यस्तै पालिकाले १ स्वास्थ्यचौकी भवन पनि निर्माण गरिसकेको छ ।

वडा नम्बर २ मा १६ किलोमिटर पक्की सडक

पालिकाको वडा नम्बर २ मा ४ वर्षभित्र १६ किलोमिटर पक्की सडक निर्माण भई सकेको छ । त्यस्तै २५ किलोमिटर माटो पटान तथा ग्राभेल, १ किलोमिटर नयाँ ट्रयाक निर्माण काम सम्पन्न भई सकेको छ ।
त्यस्तै १ किलोमिटर नाली निर्माण, १२ स्थानमा कलभर्ट निर्माण, १ पुल निर्माण काम सम्पन्न भई सकेको छ ।

त्यसैगरी ४ मन्दिर र १० भुयार थान निर्माण, ८ वटा विद्यालयका भवन निर्माण र विभिन्न संघ-संस्थाका ३ भवन निर्माण पनि सम्पन्न भई सकेको पालिकाले जनाएको छ ।

पालिकाले वडा नम्बर २ मा सेल्टर भवन पनि निर्माण गरेको छ भने ४ वटा पानी टंकी र १ स्वास्थ्यचौकी पनि निर्माण गरिसकेको छ ।

वडा नम्बर ३ का विद्यालयमा १९ कोठे भवन निर्माण

पालिकाले वडा नम्बर ३ मा रहेका विद्यालयमा १९ कोठे ४ वटा भवन निर्माण गरिसकेको छ । त्यस्तै ६ सय ५० मिटर विद्यालयमा पर्खाल निर्माण र २ ठाउँमा सेल्टर भवन पनि निर्माण गरिसकेको छ ।
साथै ३ किलोमिटर पक्की सडक, १५ किलोमिटर ग्राभेल, १.५ किलोमिटर नयाँ सडक खन्ने काम सम्पन्न भई सकेको छ भने १ सय २९ मिटर नाली निर्माण र ९ स्थानमा कल्भर्ट निर्माण काम सम्पन्न भई सकेको छ ।

त्यसैगरी १ खानेपानी टंकी, १५ किलोमिटर विद्युतिकरण, १ स्वास्थ्यचौकी ३ चर्च र मस्जिदमा भौतिक निर्माण सम्पन्न भई सकेको छ ।

वडा नम्बर ४ मा २० किलोमिटर विद्युतिकरण

राप्ती सोनारीले विद्युत्बाट वञ्चित वडा नम्बर ४ का वडावासीका लागि २० किलोमिटर विद्युतिरकण गरिसकेको छ । त्यस्तै २.४ किलोमिटर पक्की सडक निर्माण, २० किलोमिटर ग्राभेल, ७ किलोमिटर नयाँ ट्रयाक, १.३ किलोमिटर पिपिसि र ३ सय ५० मिटर आरसिसि सडक निर्माण गरिसकेको छ । साथै १ किलोमिटर नाली निर्माण, ४ स्थानमा कल्भर्ट निर्माण काम सम्पन्न गरिसकेको छ ।

६ वटा मन्दिर तथा १६ भुइहयार थान, विद्यालयमा ३ वटा शौचालय निर्माण, १ सेल्टर भवन निर्माण, १ खानेपानी टंकी निर्माण र १ स्वास्थ्यचौकी निर्माण गरिसकेको छ ।

वडा नम्बर ५ पनि २० किलोमिटर विद्युतिकरण

पालिकाले वडा नम्बर ५ मा पनि २० किलोमिटर विद्युतिकरण भई सकेको छ । त्यस्तै वडामा ४ किलोमिटर पक्की सडक निर्माण, ४.५ किलोमिटर ग्राभेल, ८ किलोमिटर नया सडक खन्ने काम सम्पन्न भई सकेको छ ।

त्यस्तै ३.५ किलोमिटर नाली निर्माण, ८ स्थानमा कल्भर्ट निर्माण, ३ वटा पुल निर्माणको पनि काम सम्पन्न भई सकेको पालिकाले जनाएको छ ।

यसैगरी ६ वटा मन्दिर र ६ वटा भुयार निर्माण एवम् ५ वटा विद्यालयमा भवन निर्माण, २ वटा विभिन्न संघ-संस्थाको भवन निर्माण, १ वटा सेल्टर भवन निर्माण, २ खानेपानी टंकी निर्माण र १ स्वास्थ्यचौकी निर्माण सम्पन्न भई सकेको छ ।

वडा नम्बर ६ को वडा कार्यालय निर्माण

पालिकाले वडानम्बर ६ को आफ्नै भवन निर्माण भई सकेको छ । साथै १० विद्यालयमा भवन निर्माण गरिसकेको छ भने ४ किलोमिटर विद्युतिरकरण पनि भई सकेको छ ।

यसका अलवा ७ सय मिटर बाटो ग्राभेल, १ किलोमिटर नयाँ ट्रयाक खोल्ने, ७ सय मिटर पीसीसी, १४ मिटर नाली निर्माण, ५ स्थानमा कल्भर्ट निर्माण, १ पुल निर्माण र ३.५ किलोमिटर झोलुंगो निर्माण पनि सम्पन्न भई सकेको छ ।

त्यस्तै १ सेल्टर भवन निर्माण, २ खानेपानी टंकी निर्माण पनि सम्पन्न भई सकेको छ ।

.

वडा नम्बर ७ मा बाटो निर्माणलाई प्राथमिकता

पालिकाले वडा नम्बर ७ मा बाटो निर्माण कार्यलाई बढी प्राथमिकतामा राखेर काम गरेको छ । पालिकाले ४ वर्षमा वडाको २ किलोमिटर पक्की सडक निर्माण गर्नुका साथै २५ किलोमिटर सडक ग्राभेल, २ किलोमिटर नयाँ ट्रयाक र १ किलोमिटर पीसीसी बाटो निर्माण गरिसकेको छ ।

त्यस्तै ४.५ किलोमिटर नाली निर्माण, २ स्थानमा कल्भर्ट निर्माण र ३ स्थानमा पुल निर्माण गरिसकेको छ । साथै ६ वटा मठमन्दिरमा भौतिक निर्माणको पनि काम सम्पन्न भई सकेको छ ।

वडा नम्बर ८ मा तटबन्धनलाई प्राथमिकता

राप्ती सोनारीको वडा नम्बर ८ मा पालिकाले ३० किलोमिटर तारजाली तथा ३० मिटर तटबन्धन गरिसकेको छ । जंगली जनवारबाट किसानको खेती जोगाउन पालिकाले तारजालीलाई प्राथमिकतामा दिएको पालिकाले जनाएको छ ।

त्यस्तै पालिकाले वडामा २.५ किलोमिटर पक्की सडक निर्माण, १५ किलामिटर बाटो ग्राभेल, ५ किलोमिटर नयाँ ट्रयाक खोल्ने, १.५ किलोमिटर नाली निर्माण, ४ वटा कल्भर्ट निर्माण र १ झोलुंगे पुल निर्माण गरिसकेको छ ।

अन्यमा ४ वटा मन्दिर र ३ भुयार थान निर्माण, ६ वटा विद्यालयमा भवन निर्माण, आफ्नै वडा कार्यालयको भवन निर्माण, १ खानेपानी टंकी निर्माण, २.५ विद्युतिकरण र १ स्वास्थ्यचौकी निर्माण गरिसकेको छ ।

वडा नम्बर ९ मा बाटो निर्माणलाई प्राथमिकता

वडा नम्बर ९ पनि बाटो निर्माणलाई नै प्राथमिकता दिइएको छ । ४ वर्षमा वडाको ३ किलोमिटर बाटो पक्की निर्माण, १६ किलोमिटर ग्राभेल, ५ किलोमिटर नयाँ ट्रयाक, ३.५ किलोमिटर नाली निर्माण, ३ वटा कल्भर्ट निर्माण र १ पुल निर्माण भएको छ ।

साथै १४ किलोमिटर तारजाली, ४ मठमन्दिरमा भौतिक निर्माण, ३ विद्यालयमा भवन निर्माण, ३ किलोमिटर विद्युतिरकण र १ नागरिक आरोग्उ केन्द्रको स्थापना गरिएको छ ।