‘जनताको भावनाअनुसार अघि बढ्नुपर्ने’

नेपाली कांग्रेसकी केन्द्रीय सदस्य शान्ति परियारले जनताको मन जितेमात्र राजनीतिक दलहरुको भविष्य सुनिश्चित हुने बताएकी छिन् । नेपाली कांग्रेस बाँकेले सोमबार पार्टी कार्यालय नेपालगन्जमा आयोजना गरेको कार्यकर्ता भेटघाट कार्यक्रमलाई सम्बोधन गर्दै केन्द्रीय सदस्य परियारले जनताको भावनाअनुसार अघि बढ्न नसके चुनावमा जनताले सवक सिकाउने बताएकी हुन् ।

परियारले जनताको सुखदुःखमा सँगसँगै हिँड्न नेता कार्यकर्तालाई आग्रह गरेकी छिन् । उनले कांग्रेसबाट उम्मेदवार भई निर्वाचित भएका जनप्रतिनिधिहरुलाई पार्टीसँग समन्वय गर्दै अघि बढ्न आग्रहसमेत गरिन् ।

स्थानीय चुनावमा कांग्रेसले बाँकेमा हासिल गरेको सफलताको उच्च प्रशंसा गर्दै उनले अब हुने प्रदेश र प्रतिनिधिसभा चुनावमा पनि कांग्रेसलाई यसरी नै जिताउने गरी लाग्न आह्वान गरिन् । उनले एक आपसको मनमुटाव र तिक्ततालाई त्यागेर कांग्रेस बनाउनतर्फ लाग्न आग्रह गरिन् ।

नेपाली कांग्रेस बाँकेका कार्यवहाक सभापति गोपालप्रसाद अधिकारीको सभापतित्वमा सम्पन्न कार्यक्रममा पूर्व सभापति कृष्णमान श्रेष्ठ, पूर्व उपसभापति फूलाराम थारु, पूर्व सचिव कपिलदेव शर्मा, महासमिति सदस्य माया पुन, क्षेत्र नम्बर ३ का क्षेत्रीय सचिव सुनिलसिंह हमाल लगायतले बोलेका थिए । उपसभापति कृष्ण बहादुर कार्कीले स्वागत मन्तव्य व्यक्त गरेको कार्यक्रमको सञ्चालन सचिव सुधांशु कोइरालाले गरेका थिए ।