डुडुवामा पोषण सम्बन्धी तालिम सुरु

बृहत पोषण विशेष कार्यक्रम सम्बन्धी ५ दिने तालिम बाँकेको डुडुवामा सुरु भएको छ । डुडुवा गाउँपालिका स्वास्थ्य शाखाद्वारा आयोजित तालिममा डुडुवाका सबै स्वास्थ्यचौकी अन्तर्गतका स्वास्थ्यकर्मीहरुको सहभागिता रहेको छ ।

तालिममा पोषण, सुत्केरीको खाना, गर्भवतीको स्याहार, कुपोषणबाट बच्ने उपाय, बालबालिकाको स्याहार, स्वास्थ्य सरसफाई, खानाको मात्रा लगायतका बारेमा गाउँपालिका स्वास्थ्य शाखा प्रमुख धनबहादुर बुढा, सह संयोजक विरेन्द्र घलेले सहजीकरण गरेका छन्
डुडुवामा गत आर्थिक वर्ष २०७७।०७८ मा १ सय ५३ जना कुपोषित बालबालिकाहरु रहेका छन् ।

त्यसमा २४ जना नयाँ जोखिम कुपोषित बालबालिका रहेका छन् भने अति जोखिम नयाँ ५ जना कुपोषित बालबालिका रहेको स्वास्थ्य शाखाले जनाएको छ ।

गत आर्थिक २०७८।०७९ मा १ सय ५० जना कुपोषित बालबालिका मध्ये १६ जना नयाँ र ४ जना अति जोखिम कुपोषित बालबालिका रहेको स्वास्थ्य शाखाका सीताराम चौधरीले बताए ।

उक्त तालिम दुई चरणमा गरिने पालिकाले जनाएको छ ।