नवौं राष्ट्रिय खेलकुदको तयारीमा हामी जुटिसक्यौंः सदस्य सचिव जयप्रकाश

कालपृष्ठ समाचारदाता
नेपालगन्ज, ११ असार

प्रदेश खेलकुद परिषद लुम्बिनीका सदस्य सचिव जयप्रकाश भंटराईले नवौं राष्ट्रिय खेलकुद प्रतियोगितामा उत्कृष्ट नतिजा निकाल्ने बताएका छन ।

सदस्य सचिव नियुक्त भएपछि पहिलो पटक बाँके, बर्दिया लगायतका जिल्ला भ्रमणमा आएका सदस्य सचिव भंटराईले पोखरामा हुने राष्ट्रिय खेलकुदमा उत्कृष्ट नतिजा निकाल्नको लागि तयारी सुरु गरिसकेको कालपृष्ठ दैनिकलाई बताए ।
उनले भने,‘नवौं राष्ट्रिय खेलकुद प्रतियोगिताको तयारीमा हामी जुटिसकेका छौं ।

राष्ट्रिय खेलकुद परिषदबाट तालिका प्राप्त हुनु बित्तिकै हामीले योजना बनाएर काम गरिरहेका छौं । अहिले जिल्लालाई त्यसमा सक्रिय बनाउने काम भैरहेको छ । प्रशिक्षण र प्रतियोगिताको बारेमा पनि तयारी भैरहेको छ ।’

नवौं राष्ट्रिय खेलकुद प्रतियोगिता गण्डकी प्रदेशमा असोज २८ देखी कात्तिक ३ गते सम्म चल्नेछ । प्रतियोगितामा सात प्रदेश, तिन विभागीय टोली नेपाल पुलिस क्लब, त्रिभुवन आर्मी, सशस्त्र प्रहरी बलको एपिएफ क्लब र एनआरएन टिमको सहभागिता रहनेछ । प्रतियोगितामा करिब ७ हजार खेलाडी १२ सय प्रशिक्षक र एक हजार निर्णायकको सहभागिता रहने अनुमान गरिएको छ ।

प्रतियोगिताको तयारी अहिले तिव्र गतिमा भैरहेको छ । यसअघि आठौं राष्ट्रिय खेलकुद प्रतियोगिता लुम्बिनी प्रदेशमा भएको थियो ।
आठौं राष्ट्रिय खेलकुद आयोजकको रुपमा प्राप्त गरेको अनुभव र उपलब्धले पोखरामा सफलता हासिल गर्न सहयोग गर्ने उनले कालपृष्ठ दैनिकलाई बताए ।

उनले थपे,‘आठौं र हालै सम्पन्न भएको १२औं राष्ट्रपति रनिङ शिल्डको सफलताले हामी उत्साही भएर तयारी गरिरहेका छौं । राष्ट्रिय खेलकुदको तयारीमा जुटनका लागी लुम्बिनी प्रदेशमा सम्पुर्ण खेलाडी, प्रशिक्षक, व्यवस्थापक र आम नागरिकलाई सल्लाह र सहकार्यका लागि अनुरोध गर्दछु ।’