अत्याधुनिक उपकरण सहित भेरीमा सुरु भयो न्युरो सेवा

न्युरो सेवा नियमित हुँदा न्युरोका बिरामीको बहिरंग सेवा तथा शल्यक्रिया मार्फत पश्चिम नेपालका विभिन्न जिल्लाबाट आउने बिरामीले सेवा लिन सक्ने अवस्था रहेको अस्पतालले जनाएको छ ।

कालपृष्ठ समाचारदाता
नेपालगन्ज, ८ जेठ

अत्याधुनिक उपकर भित्राउँदैं भेरी अस्पताल नेपालगन्जले न्युरो सेवालाई नियमित गरेको छ । भेरी अस्पतालमा विशेषज्ञ न्युरो सेवा सुरु भएसँगै अस्पतालमा बिरामीको संख्या बढन् थालेको छ । अस्पतालमा करिब तिन वर्ष अघिदेखि नै न्युरो सम्बन्धि सेवा दिने कार्यको सुरुआत गरिएको थियो । तर आवश्यक पर्ने उपकरण अभावमा सेवा नियमित हुन सकेको थिएन ।

अस्पतालले नयाँ अत्याधुनिक उपकरण भित्राएसँगै करिब दुई हप्ता अघिबाट पुन: भेरीमा न्युरो सेवा नियमित सुचारु भएको थियो । भेरी अस्पतालमा कन्सल्टेन्ट न्यूरो सर्जन डा.अञ्जन सिंह कार्की र डा.सुवोध गौतमको टिमले यस सम्बन्धि सेवा दिईरहेको छ ।

भेरीमा अब टाउँकोमा गम्भिर चोट लागेको, मतिष्कमा रगत जमेको,ब्रेन ट्युमर, मेरुदण्डको नसा च्यापिएको लगायतका सेवा नियमति रुपमा सुरु गरेको बताउँछन् भेरी अस्पतालका कार्यालय प्रमुख (मेडिकल सुपरिन्टेन्डेण्ट) डा. बद्री चापगाई ।

………..

न्युरो सेवा नियमित हुँदा न्युरोका बिरामीको बहिरंग सेवा तथा शल्यक्रिया मार्फत पश्चिम नेपालका विभिन्न जिल्लाबाट आउने बिरामीले सेवा लिन सक्ने अवस्था रहेको अस्पतालले जनाएको छ । हाल दैनिक जसो करिव ४० भन्दा बढीले न्युरो सम्बन्धि सेवा लिईरहेको कन्सल्टेन्ट न्यूरो सर्जन डाक्टर कार्की बताउँछन् । कार्कीले भने, ‘म आएको चार महिना भयो । पहिले यहाँ आउने बिरामीलाई अन्त पठाउनुको विकल्प थिएन । तर, अहिले हामीकहाँ नै बिरामी रेफर भएर आईरहेको अवस्था छ ।

अहिले त हप्तामा हामीले ४ वटासम्म शल्यक्रिया समेत गरिरहेका छौं । स्थानीय स्तरमा हामीले यसबारे जानकारी दिन सक्यौं भने, हामी धेरैलाई सस्तो र गुणस्तरिय स्वास्थ्य सेवा दिन सक्छौं ।’ भेरी अस्पतालको १५ शैयाको आईसियु वार्डमा अहिले आठ जना न्युरो सम्बन्धिका बिरामी हुने गरेको उनले बताए ।

एकाध समस्या बाहेक अन्य सबै शल्यक्रिया भेरीमै गर्न सकिने डा.सुबोध बताउँछन् । न्युरो सम्बन्धि शल्यक्रिया महँगो भएपनि निजि अस्पतालमा भन्दा धेरै सस्तो भएको बताउँदै डाक्टर सुबोध भन्छन,‘हामी कहाँ करिब पाँच गुणा कम मूल्यमा शल्यक्रिया भइरहेको छ । त्यही शल्यक्रिया प्राइभेटमा गर्नुपर्‍र्यो भने एक डेढ लाख रुपैयाँ बिरामीले तिर्नु पर्छ । तर, भेरीमा केवल २० हजार रुपैयाँमै शल्यक्रिया हुन्छ ।’

पछिल्लो पटक न्यूरो सेवाका लागि ड्रिलसेट उपकरण जडान समेत भएको छ । जापानबाट भित्र्याईएको यो उपकरण न्यूरो सर्जरीका लागि अत्यन्तै स्तरीय र उपयोगी उपकरण मानिन्छ । पश्चिम नेपालमा न्युरो सम्बन्धि उपचार हुन नसक्दा लुम्विनी र कर्णाली प्रदेशका सबै बिरामीहरु काठमाण्डौ र भारतका विभिन्न शहरमा जानुको विकल्प थिएन ।

यस अघि यहाँका विरामी लखनउ वा काठमाण्डौ जहाँ गएपनि प्रभावकारी उपचार पाउने कुरामा निक्कै समस्या रहेको उल्लेख गर्दै डा.कार्की भन्छन्,‘यस प्रकारको स्वास्थ्य समस्या सबैभन्दा गम्भिर प्रकारको समस्या हो । न्युरो सम्बन्धि उपचार सेवामा पैसा भन्दा पनि समयको बढी महत्व हुन्छ । बिरामीलाई समयमै उपचार गर्न सकिएन भने ज्यान जानपनि सक्छ र समयमै उपचार पाएको खण्डमा पक्षघात भएको बिरामी मुस्कुराउँदै घर फर्किन सक्छ । यसकारण यहाँ आवश्यक परामर्श र शल्यक्रिया दुवै हुने भएपछि यो क्षेत्र स्वास्थ्य सेवामा एक कदम अघि बढेको छ ।’

अबका दिनमा अस्पतालले शल्यक्रिया कक्षको स्तरिकरण, थप आवश्यक उपकरणको व्यवस्थापन, पर्याप्त जनशक्तिको व्यवस्थापन र ‘डेडिकेटेड न्युरो आईसियु’को व्यवस्था गर्नसके यसक्षेत्रमै उत्कृष्ट र प्रभावकारी सेवा दिनसक्ने कार्की बताउँछन् । कार्कीले, ‘हामीकहाँ अहिले अनि आधा भन्दा धेरै आईसियुमा न्युरो सम्बन्धिका विरामी छन् । अव बर्षायाम सुरुहुने वित्तिकै सर्पदंशका विरामी बढ्ने छन् । त्यस्तो अवस्थामा कसरी व्यवस्थापन गर्ने ? त्यसकारण पनि यस अस्पताललाई ‘स्ट्रोक सेन्टर’का रुपमा विकास गर्न जरुरी छ ।’