जेष्ठ नागरिक भवनको लागि सहयोग जुट्दैं

कालपृष्ठ समाचारदाता
नेपालगन्ज, १२ असार
नेपालगन्ज उप–महानगरपालिका वडा नम्बर १२ ले निर्माण गर्न लागेको जेष्ठ नागरिक मिलन केन्द्र भवन निर्माणको सहयोग रकम जुटनेक्रम सुरु भएको छ । मंगलबार भवन निर्माणको सिटिजन बैंकका सिईओ गणेश राज पोख्ररेलले १ लाख रुपैयाँ सहयोग गरेका छन् ।
यसैगरी नेपालगन्ज स्थित सिटिजन बैंकको शाखाले पनि १ लाख रुपैयाँ सहयोग गरेको छ । अर्का समाजसेवी एवम् ओम इलेक्ट्रोनिक्सका शिवराज शर्माले ११ हजार रुपैयाँ भवन निर्माणको लागि सहयोग गरेका छन् । मंगलबार एक कार्यक्रममा सहयोगदाताहरुले वडा अध्यक्ष तरुण बज्राचार्य, जेष्ठ नागरिक क्लबका अध्यक्ष अजित कुमार शर्मा, सचिव धर्मदत्त सुवेदी लगायतलाई रकम हस्तान्त्रण गरेका थिए ।

नेपालगन्ज उप–महानगरपालिका वडा नम्बर १२ ले वडा कार्यालय नजिकै जेष्ठ नागरिक मिलन केन्द्र निर्माण गर्ने तयारी गरिरहेको छ । वडा अध्यक्ष बज्राचार्यका अनुसार भवन निर्माणमा करिब १ करोड ४७ लाख रुपैयाँ खर्च हुने अनुमान गरिएको छ । भवन निर्माणमा लुम्बिनी प्रदेश सरकार, नेपालगन्ज उप–महानगरपालिका र वडाले पनि आर्थिक सहयोग गरेका छन् ।

नेपालगन्जका सुरेन्द्र हमाल लुम्बिनी प्रदेशको वन मन्त्री हुँदा २० लाख रुपैयाँ बिनियोजन गरेका थिए । अध्यक्ष बज्राचार्यले वडामा जेष्ठ नागरिकको सम्मान भवन निर्माण गर्न लागिएको बताए । जहाँ जेष्ठ नागरिकलाई आराम गर्ने, योग र ब्यायम गर्ने, छलफल र भेटघाट जस्ता कार्य गर्नको लागि सुविधा उपलब्ध हुनेछ । जेष्ठ नागरिक मिलन केन्द्र भवनमा योगा, मनोरञ्जन, आराम, बैठक हल, भान्सा घर जस्ता सुविधा हुने अध्यक्ष बज्राचार्यले कालपृष्ठ दैनिकलाई बताए ।