नयाँ वर्षमा महामन्त्री गगन थापा बाँके आउँदैं

कालपृष्ठ समाचारदाता
नेपालगन्ज, २९ चैत
नयाँ वर्षको पहिलो दिन नेपाली कांग्रेसका महामन्त्री एवम् पुर्व मन्त्री गगन थापाले बाँकेमा हुने विभिन्न कार्यक्रमलाई सम्बोधन गर्नु हुने भएको छ । हुलाकी राजमार्ग क्षेत्र केन्द्रित समुदायमा कांग्रेस अन्तर्गत ‘संवाद यात्रा’ को क्रममा महामन्त्री थापा बाँके आउन लाग्नु भएको हो ।

बैशाख १ गते र २ गते हुने कार्यक्रमको व्यवस्थापनको लागि नेपाली कांग्रेस बाँके क्षेत्र नम्बर २ र ३ सक्रिय भएर लागेका छन् । बैशाख १ गते दिउँसो २ बजे डुडुवा गाउँपालिका–५ कम्दीस्थित मिलनचोक र ४ बजे नेपालगन्जको त्रिभुवन चोकमा संवाद यात्रा तय भएको नेपाली कांग्रेस क्षेत्रीय कार्यसमिति क्षेत्र नम्बर २ सभापति रमेश कुमार गुप्ताले बताउनु भयो ।

बैशाख २ गते साझ पार्टी कार्यालयमा कार्यकर्तासँग भेटघाट कार्यक्रम रहेको गुप्ताले पत्रकार सम्मेलनमा जानकारी गराउनु भयो । यसैगरी वैशाख २ गते विहान उद्योगी व्यवसायीसँग भेटघाट र क्षेत्र नम्बर ३ खजुरामा कार्यक्रम रहेको नेपाली कांग्रेस क्षेत्र नम्बर ३ सभापति मो. नक्की खाँले बताउनु भयो । दिउँसो सुशील कोइराला क्यान्सर अस्पताल अवलोकन गर्ने कार्यक्रम तय भएको छ । बिहिबार नेपाली कांग्रेसको पार्टी कार्यालयमा भएको पत्रकार सम्मेलनमा बोल्दै नेपाली कांग्रेसका केन्द्रिय सदस्य मैकुलाल वाल्मिकीले महामन्त्री कार्यक्रमले जनतामा नयाँ उत्साह थपेको बताउनु भयो ।

उहाँले महामन्त्री थापाले २०४७ यता नेतृत्वमा पुगेका प्रधानमन्त्री, मन्त्री र नेताहरुको सम्पक्ति छानविन गर्नु पर्ने माग गर्नु भएको कुरा अत्यन्त महत्वपुर्ण भएको बताउनु भयो । देश भ्रष्टाचार कारण कमजोर भैरहेको बेला नेपाली कांग्रेस उठान गरेको यो मागले नेपाली समाजलाई सकारात्मक र सुशासनको मार्गमा लग्ने वाल्मिकीले बताउनु भयो । बिहिबार भएको पत्रकार सम्मेलनमा नेपाली कांग्रेस बाँकेका कार्यबहाक सभापति गोपाल अधिकारी, सचिव सुधान्सु कोइराला, पत्रकारहरुको लगायतको उपस्थिती रहेको थियो ।