भलिबल खेलाडीले प्राप्त गरे जनही ३ लाख पुरस्कार रकम

कालपृष्ठ समाचारदाता
काठमाडौं, १३ भदौ

सेन्ट्रल एसियन भलिबल एसोसिएसन (काभा) महिला नेसन्स लिगको उपविजेता खेलाडीलाई नेपाल सरकारले नगद पुरस्कार प्रदान गरेको छ । प्रधामन्त्री केपी शर्मा ओलीले बिहीबार खेलाडीलाई नगद पुरस्कारसहित सम्मान गरे ।

सम्मान तथा पुरस्कार वितरण कार्यक्रममा युवा तथा खेलकुद मन्त्री तेजुलाल चौधरी, राष्ट्रिय खेलकुद परिषद् (राखेप) का सदस्यसचीव टंकलाल घिसिङ, नेपाल भलिबल संघका उपाध्यक्ष भरत शाहतगायतको उपस्थिती थियो ।

साउन ३१ बसेको मन्त्रीपरिषद् बैठकले राष्ट्रिय खेलकुद विकास नियमावली अनुसार प्रतियोगितामा सहभागी १४ जना खेलाडीलाई जनही ३ लाख रुपैयाँ पुरस्कार दिने निर्णय गरेको थियो ।

यस्तै प्रशिक्षकले २ लाख तथा सहायक प्रशिक्षक, व्यवस्थापक र फिजियोले जनही १ लाख २० हजार रुपैयाँ प्राप्त गर्नेछन् । राष्ट्रिय खेलकुद परिषद् (राखेप) ले युवा तथा खेलकुद मन्त्रालयमार्फत पुरस्कारका लागि सिफारिस गरेको थियो ।

साउन १७ देखि २३ सम्म त्रिपुरेश्वरस्थित राखेप कर्भडहलमा सम्पन्न प्रतियोगिताको फाइनलमा भारतसँग पराजित हुँदा नेपाल उपाधिबाट बञ्चित भएको थियो ।

प्रतियोगितामा नेपाल, भारत, इरान, श्रीलंका र माल्दिभ्सको सहभागिता थियो ।