खजुरामा आर्टिफिसियल इन्टेलिजेन्स सम्बन्धी तालिम संचालन

कालपृष्ठ समाचारदाता
नेपालगन्ज, २५ फागुन

लायन्स तथा लियो क्लब अफ नेपालगन्ज खजुराको आयोजनामा जेन जेड एआई कनेक्ट भि जिरो.एक नामक आर्टिफिसियल इन्टेलिजेन्स सम्बन्धी तालिम संचालन गरिएको छ । खजुरा गाउँपालिकाको मुख्य सहकार्यमा नेपालगन्ज क्याम्पस अफ म्यानेजमेन्ट एण्ड टेक्नोलोजीको सौजन्यतामा कार्यक्रम संचालन गरिएको हो ।

कार्यक्रममा खजुरा गाउँपालिकाका प्लस टु तहमा अध्ययनरत विद्यार्थीहरुलाई आर्टिफिसियल इन्टेलिजेन्स एआई सम्बन्धिको अवधारणा, दैनिक जीवनमा यसको उपयोग, देखा पर्ने समस्याहरु तथा त्यस्ता समस्या समाधान र सदुपयोग गर्ने तरिकाका बारेमा प्रशिक्षण दिइएको छ ।
कार्यक्रममा बोल्दै खजुरा गाउँपालिकाका अध्यक्ष डम्बर बिकले आइटीको युग प्रवेश गर्ने क्रममा खजुराका युवा वर्गलाई यसको फाइदा र नोक्सानीसँग परिचित गराउनु समयअनुकुल रहेको उल्लेख गर्नुभयो । उहाँले यहाँका युवाहरुले यसको सदुपयोग गरेर आफ्‌नो भविष्य निर्माण गर्न सक्षम बन्न यो कार्यक्रम सहयोगी हुने र स्मार्ट गाउँपालिकाको परिकल्पनालाई साकार पार्न सहज बनाउने बताउनुभयो ।

नेपालगन्ज क्याम्पस अफ म्यानेजमेन्ट एण्ड टेक्नोलोजीले नेपालगन्ज क्षेत्रमा सबैलाई गुणस्तरीय प्राविधिक शिक्षा प्रवाह गरिरहेको र यो कार्यक्रमले खजुराका युवाहरुमा उच्च शिक्षामा योगदान पुर्‍याउने तथा बिसिए र बिएस सि, सिएस आइटी अध्ययनमा उचित मार्गदर्शन प्रदान गर्ने अपेक्षा लिइएको छ । कार्यक्रमलाई सफल बनाउन खजुरा क्याम्पस तथा लिटिल हार्वर एकेडमी खजुराको प्रभावकारी भूमिका रहेको कार्यक्रमलाई कृष्ण भण्डारीले संचालन गर्नुभएको थियो । कार्यक्रममा टिआरटिआई कलेज नेपालगन्जका निर्देशक भगत नेपालीले सहभागि विद्यार्थीहरुलाई असल भविष्य निर्माण गर्न मागदर्शन गर्नुभएको थियो । साथै विद्यार्थीहरुलाई आफ्‌नो सीप । क्षमता विकास गरेर दक्ष जनशक्तिको रुपमा विकासित हुन र सफल बन्न कलेजले सहयोग गर्ने प्रतिबद्धता जनाइएको छ ।

म्यानेजमेन्ट एण्ड टेक्नोलोजी विज्ञ एकाडमिक कोर्डिनेटर तथा व्रिलियन्ट आइटी सोल्यूशनका संचालक अंकित श्रीवास्तवले कार्यक्रममा प्रशिक्षण दिनुभएको थियो । कार्यक्रममा किग्स एजुकेशनल कन्सल्टेन्सीले विभिन्न मुलकुमा गएर अध्ययन गर्न चाहने विद्यार्थीहरुलाई सहयोग तथा प्ररामर्श दिने जनाएको छ । कार्यक्रममा भरपर्दो र गुणस्तरीय इन्टरनेट वर्ल्डलिंकले प्रदान गरेको थियो ।