कोरोना संक्रमणबाट कर्मचारीको मृत्युपछि नेपालगञ्ज उपमहानगरपालिकाको कार्यालय तीन दिन सिल

नेपालगन्ज, २२ भदौ । नेपालगञ्ज उपमहानगरपालिकामा कार्यरत एक कर्मचारीको कोरोना संक्रमणका कारण मृत्यु भएपछि कार्यालय तीन दिनका लागि सिल गरिएको छ।

कोरोना संक्रमण बढ्दै गएका कारण नेपालगन्ज उपमहानगरपालिकाले थप २३, २४ र २५ गते कार्यालय सिल निर्णय गरेको छ। हरेक हप्ता शुक्रबार र शनिबार स्थानीय प्रशासनले निषेधाज्ञा गर्ने गरेका कारण शुक्रबार पनि उपमहानगरपालिका बन्द नै हुनेछ।

नेपालगन्ज उपमहानगरपालिकाका ती कर्मचारीको कोरोना संक्रमणबाट आइतबार राति मृत्यु भएको थियो भने कर्मचारीको मृत्यु भएका कारण आज शोक जनाउँदै कार्यालय बन्द गरिएको छ।

कोरोना संक्रमण तीव्ररुपमा फैलिएपछि गत साउन २५ गतेदेखि २७ गतेसम्म नेपालगञ्जको मुख्य शहरी क्षेत्र शिल गरिएको थियो। नेपालगञ्ज उपमहानगरपालिकाका उपप्रमुख उमा थापाका अनुसार हालसम्म उपमहानगरपालिकाका ३ जना जनप्रतिनिधि र २६ जना कर्मचारी कोरोनाबाट संक्रमित भइसकेका छन्।