सोल्टी दोबाटोमा नगद लुटपाट गरेर भाग्ने ४ जना प्रहरी फन्दामा

काठमाण्डौ, २८ भदौ । काठमाडौंबाट लुटपाट गरेर भाग्न खोज्ने चार जनालाई प्रहरीले पक्राउ गरेको छ।

महानगरीय प्रहरी वृत्त, स्वयम्भूले चार जनालाई ७१ हजार ५ सय रुपैयाँ नगदसहित शनिबार साँझ पक्राउ गरेको हो।

काठमाण्डौं महानगर १४ बस्ने २४ वर्षीय सन्तोष बिष्ट, गोदावरी नगरपालिका २ बस्ने २२ वर्षीय गगन तामाङ, दक्षिणकाली बस्ने ३७ वर्षीय कृष्ण बहादुर खड्का र ३२ वर्षीय सरोज खड्कालाई महानगरीय प्रहरी वृत्त, स्वयम्भूले नियन्त्रणमा लिएको छ।

शनिबार बाँके कोहलपुर नगरपालिका ११ घर भएका ४२ वर्षीय खडक बहादुर वाइबा नागार्जुन नगरपालिका ४ बाफल चोकबाट बस चढेर स्वयम्भू जाँदै थिए। सोल्टी दोबाटो पुग्दा उनीहरुले वाइबाको ७१ हजार ५ सय रुपैयाँ लुटेर गाडीबाट झरेर भागेका थिए।

वाइबाले प्रहरीलाई तत्कालै खबर गरेपछि महानगरीय प्रहरी वृत्त स्वयम्भूबाट खटिएको प्रहरीले उनीहरूलाई पक्राउ गरेको हो।

उनीहरू बा २ ज ४१७ नम्बरको ट्याक्सी चढेर भाग्न खोजेको अवस्थामा रकमसहित फेला पारी पक्राउ गरेको हो।

उनीहरूले समूह बनाइ लुटपाट गर्ने गरेको र यस सम्बन्धमा थप अनुसन्धान भइरहेको प्रहरीले बताएको छ।