आइतबारका लागि तय भएको कांग्रेस केन्द्रीय समिति बैठक स्थगित, अर्को बैठक पनि अनिश्चित

काठमाण्डौ, २४ असोज । प्रमुख प्रतिपक्षी दल नेपाली कांग्रेसको भोलि (आइतबार) बस्ने गरी तय भएको केन्द्रीय समितिको बैठक स्थगित भएको छ।

केन्द्रीय कार्यालयका मुख्य सचिव कृष्णप्रसाद पौडेलले सूचना जारी गर्दै असोज २५ गते (आइतबार) बस्ने भनिएको केन्द्रीय कार्यसमितिको बैठक नेपाली कांग्रेसका पूर्व कोषाध्यक्ष रामवावु प्रसाई (खनुपरुदे प्रकाहा)को निधनका कारण स्थगित गरिएको जानकारी दिएका छन्।

नेपाली कांग्रेसमा केन्द्रीय पदाधिकारीहरुको निधन हुँदा १ दिन पार्टी मुख्यालयसहित देशभरका कार्यालयहरु १ दिनका लागि बन्द गर्ने चलन छ भने आइतबार बस्ने भनिएको बैठक स्थगित गरिए पनि अब बैठक कहिले बस्ने भन्ने निश्चित छैन।

यसअघि असोज १९ गतेका लागि निर्धारण गरिएको केन्द्रीय कार्यसमिति बैठक नेताहरु अर्जुननरसिंह केसी, गगनकुमार थापा लगायतलाई कोरोना भाइरसको संक्रमण देखिएपछि स्थगित गरिएको थियो।

महाधिवेशनको कार्यातालिका तय गर्न, भातृ संस्थाहरुको अवधि बढाउने निर्णय अनुमोदन गराउन तथा राप्रपाका तत्कालीन नेता सुनिलबहादुर थापासहित कांग्रेस प्रवेश गरेको नेता कार्यकर्ताहरुको व्यवस्थापन, संसदको विशेष अधिवेशन माग गर्ने लगायतका एजेन्डामा छलफल गर्न कांग्रेस केन्द्रीय कार्यसमितिको बैठक बोलाइएको थियो।