विश्वकप छनाैट : नेयमारको ह्याट्रिक, ब्राजिलको दोस्रो जित

२८ असोज, काठमाडाैं । सन् २०२२ मा हुने फिफा विश्वकपको छनौटअन्तर्गत ब्राजिलले दोस्रो जित निकालेकाे छ । बुधबार बिहान भएको विश्वकपको दक्षिण अमेरिकी छनौटअन्तर्गत ब्राजिलले पेरुलाई ४–२ गोलले हराएकाे हो ।

पेरुको मैदानमा खेलमा घरेलु टोली पेरुले सुरुवाती अग्रता बनाएको थियो । खेलको पाँचौं मिनेटमा कारिल्लोले गोल गर्दै पेरुलाई अग्रता दिलाए ।

खेलको २८औं मिनेटमा ब्राजिलले पेनाल्टीकाे माैका पाएकाे थियो, जसमा नेयमारले गोल गर्दै ब्राजिललाई खेलमा फर्काए ।

खेलकाे ५९औं मिनेटमा टापियाले गोल गरेपछि पेरुले पुनः अग्रता बनाएको थियो । ६४औं मिनेटमा रिचार्लिसनले गोल गर्दै ब्राजिललाई बराबरीमा फर्काए ।

खेलकाे ८३औं मिनेटमा ब्राजिलले पुनः पेनाल्टीको मौका पाएको थियो, जसमा नेयमारले गोल गर्दै ब्राजिललाई अग्रता दिलाए ।

८६औं मिनेटमा कार्लोस काकेडा र ८९औं मिनेटमा कार्लोस जाम्ब्रोनाले रातो कार्ड पाउँदै मैदान छोडेपछि पेरु ९ खेलाडीमा सीमित बन्न पुगेको थियो ।

त्यसपछि नेयमारले खेलको इन्ज्युरी समयमा गोल गरे । र, ब्राजिललाई ४–२ गोलको जित दिलाए ।

जितसँगै ब्राजिलले दुई खेलबाट ६ अंक जोडेको छ । पराजित पेरुसँग भने दुई अंक छ ।