सर्नेभन्दा नसर्ने रोगको जोखिम उच्च, अब स्वास्थ्य संस्थामा चेकजाँच हुने

कालपृष्ठ समाचारदाता
नेपालगन्ज, २९ असार
हाल महामारीको रुपमा फैलिएको सरुवा रोग कोभिडका कारण विश्वभर मृत्यु हुने मानिसको संख्या यो समाचार तयार पार्दासम्म ४० लाख नाघिसकेको छ । बेलाबेलामा पृथ्विमा देखापर्ने केही सरुवा रोगको प्रकोप र यसबाट प्रभावित भएका व्यक्तिहरुको संख्याको अभिलेख राखिने भएकाले सरुवा रोगप्रति बढी सचेतना पाइन्छ ।
तर नेपालको स्वास्थ्य सेवा विभागको एक तथ्यांकअनुसार आर्थिक वर्ष २०७५-७६ मा अस्पतालमा मृत्यु भएकामध्ये ९३ प्रतिशत मानिसको नसर्ने रोगबाट मृत्यु भएको थियो भने अस्पतालमा भर्ना भएका ९२ प्रतिशत बिरामीहरु नसर्ने रोगका थिए । विश्वमा ६६ प्रतिशत मानिसको मृत्यु नसर्ने रोगबाट हुने गरेको छ । यही अवस्थालाई ध्यानमा राख्दै नेपाल सरकारले अब नसर्ने रोगलाई पनि आधारभुत स्वास्थ्य सेवा अन्तर्गत राखेर स्थानीय स्वास्थ्य संस्थाबाट ती रोगको उपचार सेवा सन्चालन गर्ने भएको छ । यही वर्षको साउन महिनादेखि स्वास्थ्य संस्थाहरुबाट नसर्ने रोगको पनि चेकजाँच सेवा सुरु गरिने भएको छ ।
मंगलबार नेपालगन्ज उप-महानगरपालिका स्वास्थ्य शाखाले आयोजना गरेको एक अन्तरक्रिया कार्यक्रममा सो बारेमा जानकारी दिइएको हो । स्वास्थ्य शाखा प्रमुख रामबहादुर चन्दले नेपालमा नसर्ने रोगीका बिरामीको संख्या बढ्दै गएकाले नेपाल सरकारले ७७ वटै जिल्लामा नसर्ने रोग चेकजाँच सेवाको सुरुवात गर्न लागेकोे जानकारी दिए ।
नेपालमा मृत्यु हुने कूल बिरामीको संख्यामा सबैभन्दा बढी मुटुसम्बन्धी बिरामी, दोस्रोमा मधुमेह र तेस्रोमा क्यान्सरका बिरामी रहेका छन् । साथै विश्वभरमा पनि सबैभन्दा बढी मुटुका बिरामीको मृत्यु हुने गरेको छ ।
कार्यक्रममा जनस्वास्थ्य निरिक्षक सरोज रिमालले नसर्ने रोगको जोखिम उच्च रहेकाले समय समयमा आफ्नो स्वास्थ्यको परीक्षण गर्नु पर्ने सुझाएका थिए । उनले नसर्ने रोगको बाट बच्न व्यक्तिगत खानपान, जीवनशैली र उमेर अनुसार आफ्नो कति तौल कति हुनु पर्छ भन्ने बारेमा ध्यान दिनुपर्ने बताए । अन्तकृयामा सहभागी करिब ५० जना व्यक्तिहरुको मधुमेह र ब्लडप्रेसर चेकजाँचसमेत गरिएको थियो ।