नेपालगन्ज नाकाबाट प्लाइउड निकासी ठप्प

कालपृष्ठ समाचारदाता
नेपालगन्ज, २९ फागुन

भारतले नेपालबाट प्लाइउड निकासी रोक्न एकाएक ब्यूरो अफ इन्डियन स्ट्यान्डर्ड (बीआइएस) प्रमाणपत्र हुनुपर्ने प्रावधान ल्याए सँगै नेपालगन्ज नाकाबाट प्लाइउड निकासी ठप्प भएको हो । फागुन १८ गतेदेखि कार्यान्वयनमा ल्याएको यो प्रावधानसँगै नेपालबाट प्लाइउड निकासीमा अवरोध सुरु भएको छ । बीआइएस प्रमाणपत्र पेश गर्नुपर्ने प्रावधानसँगै नेपालगन्जलगायत भैरहवा र कृष्णनगर भन्सारबाट प्लाइउड निकासी ठप्प भएको छ ।

चालु आर्थिक वर्षको ७ महिनाको अवधिमा सवा चार अर्ब रुपैयाँ बराबरको प्लाइउड निकासी भएपछि भारतले बीआइएस प्रमाणपत्र पेश गर्नुपर्ने प्रावधान ल्याएको हो । नेपाली सामान निकासी राम्रो हुनेवित्तिकै भारतले गैरभन्सार अवरोध गर्दै आएको छ । निकासी बढ्न थालेपछि उद्योगीले निकासी रोक्न गैर भन्सार अवरोध गर्ने अनुमान गरेका थिए ।

नेपाल प्लाइउड उत्पादक संघका केन्द्रीय अध्यक्ष होमप्रसाद घिमिरेका अनुसार फागुन १८ यता विराटनगर र काँकडभिट्टा नाकाबाट मात्र प्लाइउडको निर्यात भइरहेको छ भने नेपालगन्ज, कृष्णनगर र भैरहवा नाकाबाट ठप्प छ । ओम उडका सञ्चालक एवम् संघका कोशी प्रदेश अध्यक्ष सीताराम अग्रवालले पूर्वका उद्योगले काँकडभिट्टा र विराटानगर नाकाबाट प्लाइउडको निर्यात गरिरहेको जानकारी दिए ।

संघका पूर्व केन्द्रीय अध्यक्ष एवम् नेपालगन्ज शिखर प्लाईका सञ्चालक चम्पालाल बोथडाले नेपालगन्ज नाकाबाट फागुन १८ यता प्लाइउडको निर्यात हुन नसकेको बताए । उद्योगी बोथडाका अनुसार भारतीय भन्सारले नेपालका उद्योगले बीआइएस नलिएको भन्दै रोकेपछि निर्यात अवरुद्ध भएको हो । भैरहवाको भुसाल प्लाइ उद्योगका अमृत भुसालले पनि कृष्णनगर र भैरहवा नाकाबाट निर्यात हुन नसकेको जानकारी दिए ।

केन्द्रीय अध्यक्ष घिमिरेका अनुसार नेपाल र भारतबीच २००१ मा भएको व्यापारिक सन्धिवमोजिम नेपालबाट भारततर्फ निर्यात हुने प्लाइउडलाई भारतीय पक्षले रोक्न मिल्दैन । नेपाल सरकारले प्लाइउडको नियतमा नगद अनुदान दिने निर्णय गरेपछि उद्योगीले गत आर्थिक वर्षदेखि निर्यातलाई आक्रामक बनाएका थिए । गत वर्षको बजेटमा ४ देखि ८ प्रतिशतसम्म नगद अनुदान दिने निर्णय सरकारले गरेको थियो ।

नेपालका उद्योगीले चालु आर्थिक वर्षको माघ मसान्तसम्ममा ४ अर्ब २१ करोड १४ लाख रुपैयाँ बराबरको प्लाइउड भारततर्फ निर्यात गरिसकेका छन् । भन्सार विभागले उपलब्ध गराएको तथ्याङ्कअनुसार गत आर्थिक वर्षको सोही अवधिमा २ अर्ब १६ करोड २३ लाख बराबरको मात्र निर्यात गरिएको थियो । गत आर्थिक वर्ष २०७९–८० मा ४ अर्ब ७० करोड ५२ लाख, २०७८–७९ मा ३५ करोड २३ लाख र २०७७–७८ मा १ करोड ४६ लाखको प्लाइउड निर्यात भएको विभागले जनाएको छ ।

केन्द्रीय अध्यक्ष घिमिरेले अवरोध नभएमा चालु आर्थिक वर्षमा ८ अर्बभन्दा बढीको प्लाइउड निर्यात हुने दाबी गरे । नेपालमा प्लाइउडका ७५ वटा उद्योग छन् । सबैभन्दा बढी कोशी प्रदेशमा ३४ वटा छन् । प्लाइउडको उत्पादनमा ७० देखि ७५ प्रतिशत स्वदेशी कच्चा पदार्थको प्रयोग भइरहेको उद्योगीको दाबी छ ।
स्रोतः बिजमान्डु