सुलभ र आयुषको परिवारलाई एक-एक लाख दिने डुडुवाको घोषणा

कालपृष्ठ समाचादाता

डुडुवा,  ५ असोज

बाँकेको डुडुवा गाउँपालिकाले जेनजी आन्दोलनका क्रममा ‘शहिद’ भएका नेपालगन्जका युवा स्वर्गीय शुलभराज श्रेष्ठ र आयुष थापासहित सहादत प्राप्त गरेका व्यक्तिहरुको सम्झनामा बृहत श्रद्धाञ्जली सभा गरेको छ ।

गाउँपालिका कार्यालय परिसरमा आइतबार आयोजित श्रद्धाञ्जली सभालाई सम्बोधन गर्दै गाउँपालिका अध्यक्ष नरेन्द्रकुमार चौधरीले ‘जेनजी’ समूहले भ्रष्टाचार नियन्त्रण, सुशासन कायम जस्ता विषयमा उठाएका मागहरु जायज रहेको भन्दै आन्दोलन सकिएपछि डुडुवामा एउटा समूहले कार्यालयका कागजातमा आगजनी गरेको र अर्को समूहले तालाबन्दीसहित कर्मचारीमाथि कुटपिट तथा दुव्र्यवहार गरेको बताउनुभयो ।

तालाबन्दीका कारण गाउँपालिकाको काम ठप्प हुँदा आफ्ना मालिकहरु (जनता) ले सेवा नपाएको उहाँले उल्लेख गर्नुभयो । अध्यक्ष चौधरीले डुडुवा गाउँपालिकाले जेनजी आन्दोलनमा सहादत प्राप्त गरेका बाँकेका युवा शुलभ र आयुषको परिवारलाई एक लाख एक हजार रुपैयाँका दरले सहयोग उपलब्ध गराउने घोषणा गर्नुभएको छ ।

पालिकाको बारेमा भ्रम छर्ने गरी सामाजिक सञ्जालमा फोटो र भिडियो भाइरल गरी बद्नाम गर्ने काम गरेकोमा सचेत रहन अध्यक्ष चौधरीले सबैलाई आग्रह गर्नुभयो । वि. सं.२०७४ र २०७९ सालको निर्वाचनमा पराजित भएका विजयबहादुर यादव र भण्डारीलाल यादवको नेतृत्वमा केही ब्यक्तिहरु उचालिएर लगाइरहेको आरोपमा कुनै सत्यता नभएको उहाँको भनाई छ ।

“नदीजन्य पदार्थको चोरी गर्न नपाएकाहरुले अहिले पालिकाको विरोधमा उत्रेका छन्, गत वर्ष नदीजन्य पदार्थमा पालिकाले कडाई गरेपछि चोरी शिकारी नियन्त्रण भएको छ भने सरकारलाई राजश्व समेत बृद्धि भएको छ, उहाँहरुले चोरी गर्न नपाएपछि पालिकालाई बदनाम गर्ने जस्ता कार्य गर्नुभएको छ,“ उहाँले भन्नुभयो–“मेरो पहिलो कार्यकालदेखि नै राजनितिक हिसाबले विरोध गर्दै आएका विजयबहादुर यादवको समूहले पटक पटक यस्ता क्रियाकलाप गर्दै आएको छ ।  “उहाँहरुमा नैतिकता र संस्कार नै छैन, पहिला आफू राम्रो बन्ने अनि मात्र अरुमाथि प्रश्न गर्न सुहाउँछ” उहाँले भन्नुभयो ।

सभामा बोल्दै जिल्ला समन्वय समिति बाँकेका प्रमुख ज्ञानेन्द्रकुमार चौधरीले नक्कली जेनजीले डुडुवा गाउँपालिकामाथि निराधार आरोप लगाउँदै ताला लगाएर सेवाग्राहीको कामकाज ठप्प पार्नु दुःखद भएको बताउनुभयो । सभामा वडा अध्यक्षद्वय दुर्गाप्रसाद बर्मा र आमोदकुमार तिवारीले व्यक्तिगत रिसिइबी साँध्ने उद्देश्यले चुनाव हारेका केही व्यक्तिको नेतृत्वमा एक समूहले गाउँपालिकामा तालाबन्दी गरेको उल्लेख गर्दै यो जनताविरोधी कार्य भएको बताउनुभयो ।

जेनजी प्रतिनिधि ऋतिक शाहीले आफूहरुले भ्रष्टाचार नियन्त्रण र सुशासन कायम गर्नका लागि आवाज उठाएर आन्दोलन गरेको स्मरण गराउँदै आन्दोलनको आडमा बाहिरका अराजक ब्यक्तिहरु आएर सरकारी सम्पत्तिमा आगजनी, तोडफोड र लुटपाट मच्चाएको कार्य गलत भएको बताउनुभयो । उहाँले जेनजी आन्दोलनमा बाँकेका श्रेष्ठ र थापासहित धेरैले देशमा केही परिवर्तन ल्याउनका लागि रगत बगाएको प्रष्ट्याउनुभयो ।

जेनजी आन्दोलनका नाममा घुसपैठ गरी आगजनी, तोडफोड र लुटपाटमा संलग्नलाई कारबाहीको दायरामा ल्याउनुपर्ने शाहीको माग छ । श्रद्धाञ्जली सभामा गाउँपालिका उपाध्यक्ष साहिदा बानो, वडाअध्यक्षहरु, कार्यपालिका सदस्य, वडा सदस्यसहित करीब दुई हजारको संख्यामा स्थानीयहरुको उपस्थिति रहेको बताइएको छ । सो क्रममा जेन–जी आन्दोलनमा सहादत प्राप्त गरेकाहरुको सम्झनामा एक मिनेट मौन धारण समेत गरिएको थियो ।