बर्दियामा बाबुछोरीद्वारा आत्महत्या छानबीन समिति घट्नास्थल पुगेर सुरु गर्‍यो अनुसन्धान

कालपृष्ठ समाचारदाता
बर्दिया, २६ मंसिर

बर्दियामाको बढैयातालमा नागरिकता धेरै प्रयासका बाबजुद पनि बाबुछोरीले नागरिकता नपाएपछि आत्महत्या गरेको घट्ना सम्बन्धमा सरकारले गठन गरेको छानबीन समिति घट्नास्थल पुगेको छ ।
नागरिकता नपाउँदा बर्दियामा बाबु–छोरीले ज्यान गुमाएको घटनाबारे छानबिन गर्न गठित समितिले बुधबार स्थलमै पुगेर अनुसन्धानसमेत सुरु गरेको छ ।

छानबीन समितिको पहलमा स्थानीय वडा कार्यालयमा मृतक अञ्जु थारूकी ७ वर्षिया छोरी अनिता थारूको जन्मदर्ता र आमाको मृत्यु दर्ता पनि गराइएको छ । समिति सदस्य तथा गृह मन्त्रलयका उपसचिव कुलशेखर अर्यालले घटनास्थलमा पुगेर बुझ्दा मुख्य समस्या अञ्जुको छोरीको जन्मदर्ता र उहाँको आमाको मृत्यु दर्ता नभएको भन्ने थाहा पाएपछि त्यसलाई समाधान गरिएको बताउनुभयो ।

‘हामी वडा कार्यालयमै पुगेर अञ्जुको बुवाको मृत्युदर्ता र उनको छोरीको जन्म दर्ता (अञ्जुको श्रीमान अनिलको नामबाट) जन्म दर्ता गराएका छौं,’ समिति सदस्य अर्यालले भन्नुभयो, ‘आज हामी समिति संयोजक सुरेश पन्थीज्यूको नेतृत्वमा सबै सदस्यहरू बढैयाताल वडा नम्बर ४ मा पुगेर समग्र बस्तुस्थिति बुझेर सर्वपक्षीय छलफल गरी बालिकाको जन्म दर्ता र अञ्जुकी आमाको मृत्यु दर्ता गर्ने प्रक्रिया सम्पन्न गर्‍यौं, बाँकी समस्या हामी बुझेर प्रतिवेदनमा खुलाउने छौं ।’
अञ्जुका श्रीमान् अनिलविरुद्ध आत्महत्या दुरुत्साहनमा मुद्दा र पक्राउ पुर्जी जारी भएको छ भने मानवअधिकार आयोगले पनि छानबिन गरिरहेको जनाएको छ । बर्दियाको बढैयाताल वडा नम्बर ४ दक्षिण भकारीकी २१ वर्षीया अञ्जु थारू पतिबाट उपेक्षित भएपछि अदालतले अंशको फैसला गरेको थियो, तर नागरिकता नहुँदा उहाँले अंश पाउन सक्नुभएको थिएन ।

गृह मन्त्रालयको २१ मंसिरमा सहसचिव तथा नीति, योजना अनुगमन तथा मूल्यांकन महाशाखा प्रमुख सुरेश पन्थीको संयोजकत्वमा मन्त्रालयकै उपसचिव अर्याल र बर्दियाका सहायक सीडीओ अशोककुमार भण्डारी सदस्य रहेको छानबिन समिति गठन गरिएको थियो । समितिलाई प्रतिवेदन बुझाउन पाँच दिनको समय दिइएको छ ।

समितिलाई घटनाको निष्पक्ष र सत्यतथ्य रुपमा जाँचबुझ गरी पाँच दिनभित्र प्रतिवेदन पेश गर्ने गरी समितिलाई आदेश दिइएको छ । यस्तै घटनाको सत्यतथ्य बुझ्न भन्दै प्रधानमन्त्री सुशिला कार्की पनि गृहमन्त्री अर्याललाई निर्देशन दिनुभएको थियो ।