सरकार विरुद्ध बोल्नेलाई प्रतिसोध साध्ने काम भएको छः नेता महर

साबित्री बिश्वकर्मा
नेपालगन्ज, १२ असोज
नेपाली कांग्रेसका केन्द्रीय सदस्य नैनसिंह महरले सरकारको विरुद्धमा बोल्ने व्यक्तिलाई प्रतिसोध साध्ने काम बढिरहेको आरोप लगाउनु भएको छ । सोमबार नेपालगन्जमा पत्रकारहरुसँग भेटघाटको क्रममा महरले सरकारको विरुद्धमा लेखेकै भरमा अहिले पक्राउ गर्ने प्रविधि बढिरहको बताउनु भयो ।

नेपाली कांग्रेसको १५ औँ केन्द्रीय महाधिवेशनको क्रममा पुर्व मेची देखि पश्चिम महाकालीसम्मको देश दौडाह गरिरहेको बताउँदै महरले वर्तमान अवस्थामा सरकाले देखाएको रवैया जनमूखी नभएको बताउनुभयो । अबको अवस्थामा ईतिहास बोकेको नेपाली कांग्रेसलाई समय सान्र्दभिक बनाउन थुप्रै चुनौतीहरु रहेका भएता पनि कांग्रेसले जिम्मेवारी आफ्नो काँधमा लिनुपर्ने बेला आएको बताउनुभयो ।

२०८२ को भाद्र पछि देशमा स्थापित भएको असमानजस्य स्थितीले राजनीतिक संरचना नै उथलपुथल बनाएको उहाँले बताउनुभयो । उहाँले भन्नुभयो ‘सरकार र जनताको तालमेल मिल्न सकेको छैन । सरकार जनता प्रति उत्तरदायि भएको छैन । यतिबेला नेपाली कांग्रेस जनताको पक्षमा सशक्त रुपमा जनताको सामिप्य र इच्छालाई बुझेर अगाडी बढ्नुपर्ने भएको छ ।’

वर्तमान सरकारलाई विश्वास गरेर अत्यधिक मतका साथ बिजयी गराएता पनि समग्र नागरिक समाज सरकारसंग त्रसित हुनुपरेको अवस्था रहेको उहाँले बताउनुभयो । यस्तो अवस्थाबाट नेपाली जनतालाई कसरी बाहिर ल्याउने भन्नेमा नेपाली कांग्रेस केन्द्रित रहेको उहाँले बताउनुभयो ।

यो वर्तमान अवस्थामा सृजित परिस्थितीलाई सम्हाल्न सक्ने र उत्तरदायि हुँदै विश्वसामु उभिनुपर्ने चुनौती रहेको बताउनुभयो । अब नेपाली कांग्रेसमा जेन्जीको नवप्रर्वतन र पाका पुस्ताको अनुभवको संयोजन हुने गरी अगाडी बढ्नुको बिकल्प नरहेको उहाँको भनाई रहेको थियो । नेता महरले आफु आगामी अधिवेशनमा महामन्त्री पदको आंकाक्षी भएको समेत बताउनु भयो ।