वैशाखमा नेपालगन्ज क्रिकेट कप लिग हुँदैं

कालपृष्ठ समाचारदाता
नेपालगन्ज, २५ चैत
बाँके जिल्ला क्रिकेट संघको आयोजनामा नेपालगन्ज क्रिकेट कप लिग प्रतियोगिता–२०७९ हुने भएको छ । बैशाखको १७ देखि हुने प्रतियोगिता कोहलपुर स्थित कोहलपुर क्रिकेट मैदानमा हुनेछ ।

टि–२० क्रिकेट प्रतियोगिताको विजेताले १ लाख र उपविजेताले ५० हजार रुपैयाँ प्राप्त गर्ने बाँके जिल्ला क्रिकेट संघका अध्यक्ष सरोवर प्रसाईले बताए । बाँके जिल्लामा रहेका क्लबलाई सक्रिय बनाउनका लागि प्रतियोगिता गर्न लागेको प्रसाईले बताए ।

उनले भने,‘जिल्लामा क्रिकेटको स्तर वृद्धि गर्नको लागि क्लब क्रिकेट बलियो हुनुपर्छ । क्रिकेटका क्लबहरु पनि सक्रिय हुनु पर्छ । क्लबलाई चलायमान बनाउनका लागि प्रतियोगिता आयोजना गरिएको हो । यसले बाँकेको क्रिकेटको स्तर बृद्धि गर्दै खेलाडीलाई अवसर प्रदान गर्नेछ ।’
पछिल्लो समय बाँकेमा रहेका क्रिकेट क्लब कमजोर भएका कारण क्लबलाई प्राथमिकतामा राखेर प्रतियोगिता गर्न लागेको अध्यक्ष प्रसाईले कालपृष्ठ डटकमलाई जानकारी गराए ।

प्रतियोगितामा सहभागी हुन चाहने क्लबले वैशाख १० गते सम्म बाँके जिल्ला क्रिकेट संघमा टिम दर्ता गर्नु पर्नेछ । प्रतियोगितामा बाँके जिल्लाका क्लबलाई मात्र सहभागी गराउने क्रिकेट संघले नियम बनाएको छ ।

नेपालगन्ज उप–महानगरपालिकाको सहयोगमा हुन लागेको प्रतियोगिताको प्रमुखका रुपमा राजेन्द्र मानन्धरलाई जिम्मेवारी दिइएको छ ।