उम्मेदवारी दर्ता गर्न सकस

विष्णुप्रसाद देवकोटा
डोल्पा, १२ वैशाख

मुख्य निर्वाचन अधिकृत तथा जिल्ला न्यायधिश केशवराज चपाईका अनुसार उम्मेदवारी दर्ताको पहिलो दिनमा कसैले उम्मेदवारी दर्ता नभएपछि दोस्रो दिन उम्मेदवारी दर्ता गर्न सकस भएको छ । सबै पार्टी र स्वतन्त्रबाट उम्मेदवारी दर्ता भएकाले समय अभावले सबैको विवरण आउन नसकेको र राती अवेरसम्म उम्मेदवारी दर्ता प्रकृया समाप्त गरेर अन्तिम नामावली प्रकासित गरिने कार्यक्रम रहेको उनले जानकारी दिए ।

वैशाख ३० गते हुने स्थानीय तह निर्वाचनको लागि उम्मेदवारी दर्ता गर्ने दोस्रो दिनमा त्रिपुरासुन्दरी नगरपालिकामा प्रमुख पदमा नेपाली कांग्रेसको तर्फबाट चन्द्रलाल धराला, उपप्रमुख पदमा शावित्री पहाडी र नेकपा एमालेको तर्फवाट प्रमुखमा जनचन्द्र रोकाया, उपप्रमुखमा देवी घर्तिको उम्मेदवारी परेको छ ।

यसैगरी नेकपा माओवादी केन्द्रबाट प्रमुखमा दिलबहादुर विष्ट, उपप्रमुखमा कालि चलाउनेको उम्मेदवारी दर्ता भएको छ । नेकपा एकीकृत समाजवादीको तर्फबाट उपप्रमुखमा छक्कबहादुर धरालाको उम्मेवारी परेको छ ।

स्वतन्त्रतर्फ नेकपा एमालेका लागी उम्मेदवारको रुपमा नगरप्रमुख पदमा विमल पहाडी(विवाकर पहाडी)को उम्मेदवार परेको छ भने नेपाली काँग्रेसको उपप्रमुख पदमा रमा बोहराको स्वतन्त्रबाट वागी उम्मेदवारी दर्ता भएको छ ।

ठूलीभेरी नगरपालिकाको नगरप्रमुख पदमा नेपाली कांग्रेसबाट शुवर्णबहादुर बुढा, नेकपा एमालेबाट पूर्णबहादुर डाँगी, नेकपा माओवादीबाट प्रमुख पदमा विरेन्द्र डाँगी, एकीकृत समाजबादीबाट कर्णबहादुर रोकायाको उम्मेदवारी दर्ता भएको छ ।
स्वतन्त्रबाट प्रमुख पदमा प्रेमबहादुर बोहराको उम्मेदवारी दर्ता भएको छ ।

शे–फोक्सुण्डो गाउँपालिका अध्यक्षमा नेकपा एमालेका धावासम्दुक लामाको मात्र एकल उम्मेदवारी परेको छ । मुड्केचुला गाउँपालिका अध्यक्षमा नेकपा एमालेबाट लंकबहादुर रोकाया र नेकपा माओवादी केन्द्रबाट दत्तबहादुर शाहीको उम्मेदवारी दर्ता भएको छ ।

जगदुल्ला गाउँपालिका अध्यक्षमा नेकपा माओवादी केन्द्रका नारासिं रोकाया र नेकपा एमालेबाट धनजित बैजीको उम्मेदवारी परेको छ ।

प्रदेशबाट सत्तागठबन्धन दलहरुले जिल्लामा गठबन्धन गर्ने सर्कुलर गरे पनि भागवण्डामा सहमति हुन नसकेपछि सबै दलले एक्ला एक्लै उम्मेदवारी दर्ता गरी प्रतिस्पर्धामा उत्रने अवस्था देखिएको छ । यो समाचार तयार पारुन्जेल सम्म उम्मेदवारी दर्ता प्रकृया जारी छ ।