एक महिनामा ५५ हजार विदेशीय

कालपृष्ठ डेस्क
काठमाडौं, १२ वैशाख

चुनाव नजिकिँदै जाँदा गत चैत महिनामा रोजगारीका लागि विदेशिने नेपाली श्रमिकको संख्यामा वृद्धि भएको छ । फागुनमा भन्दा चैतमा विदेश जान श्रम स्वीकृति लिनेको संख्या २ हजारले घटेको छ ।

वैदेशिक रोजगार विभागका अनुसार चैत महिनामा ५५ हजार ५ सय २३ जना नेपाली रोजगारीका लागि विदेश गएका छन् । चैतमा दैनिक औसत १ सय ८५० जना श्रमिक विदेश गएका छन् ।

वैदेशिक रोजगारीमा जाने नेपालीको संख्या गत जेठयता लगातार उकालो लागिरहेकामा पुसबाट घट्न सुरु गरेको थियो ।
बितेको चैत महिनामा बाहिरिएका साढे ५५ हजारमध्ये २७ हजार १ सय ५६ जनाले नयाँ श्रम स्वीकृति लिएका थिए भने अन्यले श्रम स्वीकृति नवीकरण गरेका थिए ।

फागुन महिनामा ५३ हजार ४ सय ५७ जना विदेश जान श्रम स्वीकृति पाएका थिए । माघ महिनामा यसको संख्या ५४ हजार ४ सय ७० जना थियो ।
गत पुस महिनामा दैनिक औसत वैदेशिक रोजगारीमा जानेको संख्या करिब २ हजार र मंसिरमा २ हजार ५ सय थियो । पुस महिनामा ६६ हजार ६ सय २५ जना श्रमिकले वैदेशिक रोजगारीमा जान श्रम स्वीकृति लिएका थिए भने मंसिर महिनामा ७४ हजार ३ सय ५४ जना नेपाली श्रमिक वैदेशिक रोजगारीका लागि विदेश पुगेका थिए ।

वैदेशिक रोजगार विभागका अनुसार कोरोना महामारीका कारण दुई वर्षयता वैदेशिक रोजगारीमा आएको संकट हट्दै गएपछि विदेशिने नेपालीको संख्या नियमित गतिमा फर्किएको छ ।
अहिले पनि खाडी मुलुक कतार, साउदी अरेबिया र यूएईमा जाने नेपालीको संख्या धेरै छ । कुवेत, ओमान लगायतका देशमा पनि नेपालीहरु गइरहेका छन् । चैत महिनादेखि मलेसियाबाट पनि माग आउन थालेकाले अब विदेसिने नेपालीको संख्या केही बढेको हो ।

विभागका अनुसार २०७८ वैशाखमा २४ हजार ३ सय ६३ जना नेपाली रोजगारीका लागि विदेश गएका थिए । तर, जेठमा विदेशिने नेपालीको संख्या घटेर ४ हजार ८६ मा सीमित भएको थियो । असारमा २० हजार ६५८ जना नेपालीले विदेश जान श्रम स्वीकृति लिए ।

विभागका अनुसार साउनमा २५ हजार ४ सय २८ जना, भदौमा ३६ हजार ४० जना, असोजमा ३९ हजार ६ सय ७१ जना र कात्तिक महिनामा ५४ हजार ९ सय १८ जना नेपाली कामका लागि विदेश उडेका थिए ।