जंकफुड र प्लाष्टिकमा प्रतिबन्ध लगाउँदै राप्ती

दाङ जिल्लाको राप्ती गाउँपालिकाले जंकफूड र प्लाष्टिकका माला तथा खादा प्रयोगमा प्रतिबन्ध लगाएको छ । राप्तीले गाउँपालिकामा आयोजना हुने कुनै पनि सार्वजनिक कार्यक्रममा जंकफूड तथा कोल्ड ड्रिंक्स आदि प्रयोग गर्न नपाइने निर्णय गरेको हो ।

असार १९ गते बसेको कार्यपालिका बैठकले जंकफूडको सट्टा स्थानीय रूपमा उत्पादित प्राकृतिक तथा दुग्धजन्य पदार्थको प्रयोगको प्रबन्ध गर्नुपर्ने कार्यपालिका बैठकले निर्णय गरेको छ । गाउँपालिकाले भने असार ३० गते आफ्नो आधिकारिक फेसबुक पेजमार्फत् पनि सार्वजनिक गरेको हो ।

पछिल्लो समय सम्मानका नाममा जताततै स्वागत सत्कार बढी तामझामयुक्त भइरहेको समयमा गाउँपालिकाको कार्यपालिका बैठकले निर्णय गरी प्लाष्टिक माला र खादा प्रयोगमा प्रतिबन्ध लगाउने निर्णय गरेको हो ।

गाउँपालिकाका प्रमुख प्रशासकीय अधिकृत शोभाराम रिजालले गाउँपालिका क्षेत्रभित्र रहेका सरकारी कार्यालय, स्वास्थ्य संस्था, विद्यालय, बैंकिङ तथा वित्तीय संस्था लगायत पालिकाभित्र सार्वजनिक कार्यक्रम गर्न चाहने संघ संस्थाले रबरजन्य प्लाष्टिकका फूल माला, खादा आदि प्रयोग गर्न नपाउने निर्णय भएको बताए ।

त्यस्ता कार्यक्रम गर्दा कोल्ड ड्रिंक्सका नाममा फ्रुटी, कोकोकोला, फेन्टा जस्ता पिय पदार्थसमेत प्रयोगमा प्रतिबन्ध लगाउने निर्णय भएको रिजालले जानकारी दिए ।
प्लाष्टिकजन्य फूल, माला र खादाको सट्टा गाउँपालिकाले सुतिको कपडाबाट निर्मित सेतो गम्छा प्रयोगमा ल्याउन प्रस्ताव गर्न सकिने प्रमुख प्रशासकीय अधिकृत रिजालले बताए ।

जिल्लाका १० पालिकामध्ये जंगफूड र प्लाष्टिकजन्य माला खादा प्रयोगमा प्रतिबन्ध लगाउने निर्णय गर्ने राप्ती गाउँपालिका निर्णय गर्ने पहिलो पालिका हो ।
यो पालिका लुम्बिनी प्रदेशको स्थायी राजधानी पनि हो ।