ग्यान्सले जेष्ठ नागरिकलाई सम्मान तथा सामुदायिक भवन बारे छलफल गर्ने

अष्टिन (टेक्सास) – अष्टिन तथा यस आसपासमा बस्ने जेष्ठ नेपालीहरुलाई सम्मान तथा अभिनन्दन गरिने भएको छ ।

अष्टिनमा रहेको नेपालीहरुको संस्था ग्रेटर अष्टिन नेपाली सोसाइटी (ग्यान्स) ले आउंदो आइतबार अष्टिन र यस आसपासमा बसोवास गर्ने जेष्ठ नेपाली नागरिकलाई अभिनन्दन र सम्मान गर्न लागेको हो । अष्टिनमा बसोवास गरिरहेका जेष्ठ आमा वुवालाई आउने आइतवार सम्मान तथा अभिनन्दन गरिदै छ ग्यान्सका अध्यक्ष देबराज न्यौपानेले भन्नुभयो- “सो अवसरमा प्रस्तावित सामुदायीक भवन बारेमा पनि छलफल हुनेछ ।”

अष्टिनमा नेपालीहरुको संख्या बृद्धि भइरहेसंगै नेपालीहरुको आफ्नै सामुदायीक भवनको आवश्यकता खड्किरहेका बेला ग्यान्सले गर्न लागेको छलफलले केही निश्कर्ष निकाल्ने अपेक्षा गरिएको छ । यसअघि पनि सामुदायीक भवनबारे बिभिन्न चरणमा छलफल भएका थिए ।

सामुदायीक भवनका विषयमा गर्न लागेको छलफल तथा जेष्ठ नागरिकलाई सम्मान कार्यक्रममा उपस्थित हुन ग्यान्सले सबैमा आग्रह गरेको छ ।

आउने आइतवार अर्थात यही २८ तारिख दिउंसो साढे २ बजेपछि फुल्गरभिल लाइब्रेरीमा कार्यक्रम आयोजना गरिएको अध्यक्ष न्यौपानेले बताउनुभयो ।