अतिविपन्न बालबालिकाको पढाई खर्च व्यहोर्ने सांसद खत्रीको घोषणा

कालपृष्ठ समाचारदाता
नेपालगन्ज, १८ मंसिर
लुम्बिनी प्रदेशका सांसद रत्नबहादुर खत्रीले अति विपन्न तीन घरपरिवारका बालबालिकालार्ई पाँच बर्षसम्म अध्ययन अध्यापनको सम्पूर्ण जिम्मेवारी वहन गर्ने घोषणा गरेका छन् । बाँके, प्रदेश सभा–३ (क) बाट निर्वाचित खत्रीले आफ्नो निर्वाचन क्षेत्रका बालबालिकाको सम्पूर्ण पढाई खर्च व्यहोर्ने घोषणा गरेका हुन् ।
एमाले निर्वाचन परिचालन कमिटीको बैठकमा आइतबार खत्रीले निर्वाचन क्षेत्र अन्तर्गतका दलित मधेसी–मुस्लिम र थारु समुदायका १÷१ जना गरी ३ जना विद्यार्र्थीको पाँच बर्ष सम्म अध्ययन अध्यापनको सम्पूर्ण जिम्मेवारी आफुले बहन गर्ने घोषणा गरेका हुन् ।
प्रदेश सांसद खत्रीले पार्टी कमिटीले अति विपन्न घर परिवारका बालबालिकाको पहिचान गरि छनोट गर्ने बताए । जनतासँगको सम्बन्धलाई बलियो बनाउन निर्बाचन क्षेत्रमै सम्पर्क कार्यालय स्थापना गरि समन्वयको काम अघि बढाउने बताए ।
सम्पर्क कार्यालयमा समन्वयका लागि एक जना कर्मचारी ब्यवस्था गर्ने उनले जनाए । खत्रीले निर्वाचनको समयमा प्रत्येक महिनामा एक दिन निर्वाचन क्षेत्र अन्तर्गतका हरेक वडाका गाउँ बस्तीमा प्रत्यक्ष पुगेर निरन्तर जनतासँग अन्तरक्रिया गरि अघि बढ्ने प्रतिबद्धता ब्यक्त गरे ।
निर्वाचन परिचालन समितिका संयोजक एवम् एमाले प्रदेश कमिटी सदस्य घननाथ खनालले निर्वाचनका समयमा जनतासँग गरिएका प्रतिबद्धता पुरा गर्न निर्वाचित सांसदसँगै पार्टी कमिटी पनि प्रतिबद्ध भएर लाग्ने बताए ।