राष्ट्र बैंक अगाडी व्यवसायीले दिए धर्ना, बैंकको अव्यवहारिक नीति खारेज गर्न माग

कालपृष्ठ समाचारदाता
नेपालगन्ज, ११ पुष
राष्ट्र बैंकको ‘अब्यवहारिक नीति’का विरुद्ध नेपालगन्जका उद्योगी, व्यवसायीले दोस्रो चरणको आन्दोलन सुरु गरेका छन् । आन्दोलन स्वरुप यहाँका उद्योगी ब्यवसायीले राष्ट्र बैंक कार्यालय नेपालगन्जमा धर्ना लगायतका कार्यक्रम गरेका हुन् । सोमबार राष्ट्र बैंक अगाडी एक घण्टा आन्दोलनका कार्यक्रम गर्दै राष्ट्र बैंकको कामकाजलाई प्रभावित गरिएको थियो ।

उद्योगी, व्यवसायीको छाता संगठन नेपालगन्ज उद्योग वाणिज्य संघको नेतृत्वमा सोमबार बिहान उद्योगी ब्यवसायीले धर्ना दिएका थिए । करिव एक घण्टासम्म राष्ट्र बैंक नेपालगन्जको कार्यालय अगाडी धर्ना दिएका उनीहरुले विभिन्न नाराबाजी समेत गरे । धर्नाका क्रममा केन्द्रिय सदस्य चक्र अधिकारी, संघका पदाधिकारी, पुर्वअध्यक्ष तथा पदाधिकारी लगायत नेपालगन्जका उद्योगी, व्यवसायीहरु ठुलो संख्यामा उपस्थित भएका थिए । व्यवसायीहरुको आन्दोलनलाई साथ दिनका लागि बाँके क्षेत्र नम्बर २ का संघीय सांसद डा. धवल शम्सेर राणा, नेपालगन्ज उप–महानगरपालिका प्रमुख प्रशान्त विष्टले समेत धर्ना दिएका थिए ।

………….

संघका महासचिव चिरञ्जीवी ओलीले पहिलो चरणको आन्दोलनबाट समस्या समाधान नभएपछि दोस्रो चरणको आन्दोलन गर्नु परेको बताए । ‘यो दोस्रो चरणको आन्दोलन हो, राष्ट्र बैंकले अब्यवहारिक खालको ‘चालु कर्जा मार्ग निर्देशन–२०७९’ कात्तिक १ गतेदेखी लागु हुने गरी जारी गरेको छ, यसबाट ब्यवसायीहरु आतंकित हुने परिस्थिती छ अहिले,’ ओलीले भने ‘ब्यवसायीले लिएको ऋण हरेक वर्ष एक पटक चुक्ता गर्नुपर्ने, ब्यवसायीको सामान गोदाममा छ, अब पैसा लिएर कसरी ऋण चुक्ता गर्न सकिन्छ ?’ कर्जा लिने कारोबारको २०-२५ प्रतिशत मात्रै ऋण पाउने ब्यवस्था राष्ट्र बैंकले गरेको र त्यो अब्यवहारिक रहेको महासचिव ओलीले सुनाए । उनले थपे, ‘अकस्मात लागु गर्न खोज्दा ब्यवसायीहरु चल्न सक्ने अवस्था छैन ।’
कर्जा लिने कारोबारको २०–२५ प्रतिशत मात्रै ऋण पाउने ब्यवस्था राष्ट्र बैंकले गरेको र त्यो अब्यवहारिक रहेको महासचिव ओलीले सुनाए । राष्ट्र बैंक कार्यालयमा धर्ना दिनु अघि संघको कार्यालय त्रिभुवन चोक पुर्वी लाइनबाट अध्यक्ष अब्दुल वाहिद मन्सुरीको नेतृत्वमा उद्योगी, ब्यवसायीले प्रर्दशन गरेका थिए ।

राष्ट्र बैंकले आफनो नीतिमा परिवर्तन नगरे निरन्तर रुपमा संघर्षका कार्यक्रमलाई निरन्तरता दिने नेपालगन्ज उद्योग वाणिज्य संघकी सदस्य एवम् व्यवसायी विन्दु चर्तीमगरले बताईन् ।
उक्त प्रदर्शन सदरलाईन, न्युरोड, धम्बोझी चोक हुदै राष्ट्र बैंक नेपालगन्जको कार्यालय अगाडी पुगेर धर्नामा परिणत भएको थियो । प्रर्दशनका क्रममा कालो ब्यानर र प्लेकार्ड सहित उद्योग, व्यवसायीले चर्को नारा लगाएका थिए ।