स्वास्थ्य विमा अभिकर्ता नहुँदा डोल्पामा स्वास्थ्य विमाको पहुँच वाहिर डोल्पाका नागरिक

विष्णुप्रसाद देवकोटा
डोल्पा, फागुन १४

जिल्लामा स्वास्थ्य विमा अभिकर्ता नहुँदा जिल्लाका अधिकाँश नागरिक स्वास्थ्य विमाको पहुँच भन्दा वाहिर रहेका छन् । हाल सम्म जिल्लामा स्वास्थ्य विमा गर्नेको संख्या २ हजार ६ सय ६० रहेको छ । जिल्ला स्वास्थ्य सेवा कार्यालय अन्तरगत स्वास्थ्य विमा वोर्डका संयोजक राजन डाँगीका अनुसार स्वास्थ्य विमा गर्नेहरुमा महिला १ हजार ३ सय ७८ पुरुष १ हजार २ सय ८२ जना रहेका छन् । आठ वटा स्थानीय तह रहेको जिल्लामा विमा अभिकर्ताहरुले काम गर्न छाडेपछि समस्या भएको जिल्ला स्वास्थ्य विमा वोडले जनाएको छ ।

माघ मसान्त सम्म ६ सय ९४ घरधुरीका २ हजार ६ सय ६० जनाले मात्र बिमा गरेको स्वास्थ्य सेवा कार्यालयले जनाएको छ । विमित संख्या मध्ये जेष्ठ नागरिक महिलाको संख्या ६५ र पुरुषको संख्या ५२ रहेको छ । अति गरीवको संख्या पुरुष ४ र महिला ३ जना छन । यसै गरी पूर्णरुपमा अशक्त घरपरिवारका पुरुष ३७ र महिला ३६ जनाले विमा गर्नु भएको छ । महिला स्वास्थ्य स्वयंसेविकाका १ सय ३ परिवार संख्यालाई सरकारले ५० प्रतिशत विमा गरि दिएको छ भने बाँकी सबैलाई सयमा सय प्रतिशत बिमा सरकारले गरेको स्वास्थ्य विमा संयोजक राजन डाँगीले बताए ।

आठ ओटा स्थानीय तह रहेको जिल्लामा सदरमुकाम दुनै आसपासका ठूलीभेरी नगरपालिका र त्रिपुरासुन्दरी नगरपालिकाका केहि जेष्ठ पुरुष तथा महिलाहरुले विमा गरेपनि अधिकाँश पालिकाका नागरिकले स्वास्थ्य विमा नगरेको पाइएको छ । विमा वोर्ड संयोजक डाँगीका अनुसार पालिकाहरुमा नियुक्त गरिएका विमा अभिकर्ताहरुले नै काम छाडेपछि समस्या भएको छ । स्वास्थ्य सेवा कार्यालयमा रहेको स्वास्थ्य बिमा बोर्ड अन्तरगत स्थायी संरचना नभएकाले स्वास्थ्य मन्त्रालयबाट काजमा १ जना र स्वाथ्य विमा बोर्डवाट १ जना गरी दुई जना भएपनि १ जना दैलेखमा काजमा गएदेखि फिर्ता भएक छैनन् जसले गर्दा काममा समस्या भएको जनाइएको छ ।