दोस्रो लुम्बिनी प्रदेशस्तरीय जुडो प्रतियोगिताको उपाधि मंगोलियनलाई

कालपृष्ठ समाचारदाता
नेपालगन्ज, २० फागुन

बाँकेको डुडुवा गाउँपालिकामा शनिबार सम्पन्न दोस्रो लुम्बिनी प्रदेशस्तरीय खुल्ला जुडो प्रतियोगिताको उपाधि बाँकेको खजुरामा रहेको मंगोलियन जुडो डोजेले उचालेको छ । मंगोलियनले ६ स्वार्ण, २ रजत र ५ कास्य जित्दै उपाधि जितेको हो ।
दोस्रो भएको दाङ जुडो डोजोले ३ स्वार्ण, ४ रजत र ३ कास्य जित्यो भने २ स्वर्ण, ४ रजत र ६ कास्यसहित प्रतियोगिता आयोजक कम्दी जुडो डोजो तेस्रो बन्यो ।

त्यस्तै बर्दिया जुडो डोजोले भने १ स्वार्णमात्र जित्न सफल भयो । प्रतियोगिता डुडुवा गाउँपालिकाकाको समन्वयमा कम्दी जुडोले शुक्रबारदेखि डुडुवा गाउँपालिकामा संचालन गरेको थियो । प्रतियोगितालाई डुडुवा गाउँपालिकाका अध्यक्ष नरेन्द्र कुमार चौधरीले उद्घाटन गरेका थिए ।

प्रतियोगितामा लुम्बिनी प्रदेशका बाँके, बर्दिया, दाङ, कपिलबस्तु गरी ६ वटा जुडो कल्बका १ सय ३० खेलाडीहरुको सहभागिता रहेको थियो । प्रतियोगितामा महिला र पुरुषतर्फ ६–६ विद्यामा प्रतिस्पर्धा गराइएको थियो । महिलातर्फ ४०, ४४, ४८, ५२, ५७ केजी र खुल्ला तौल समूह तथा पुरुषतर्फ ४०, ४५, ५०, ५५, ६० केजी र खुल्ला तौल समूहमा प्रतिस्पर्धा भएको हो ।