उपमेयर राईलाई पक्राउ गर्न अदालतको आदेश, प्रहरी भन्छ घटना अनुसन्धानकै क्रममा छ

कालपृष्ठ समाचारदाता
नेपालगन्ज, २७ फागुन

अदालतले पक्राउ पुर्जी जारी गरेको एक महिना भन्दा बढी समय बित्दा समेत बाँके प्रहरीले नेपालगन्ज उप–महानगरपालिकाका उपमेयर एवम् जसपा नेता कमरुद्दीन राईलाई पक्राउ गरेको छैन् । बाँके जिल्ला अदालतले गत माघ १८ गते राईलाई दोषि ठहर गर्दै पक्राउ पुर्जी जारी गरेको थियो । उपमेयर राईलाई जिल्ला अदालत बाँकेले सार्वजनिक न्याय विरुद्धको कसुरको बारेमा अनुसन्धान गर्नको लागि पक्राउ पुर्जी जारी गरेको थियो ।

राई विरुद्ध सर्वदेव ओझाले सार्वजनिक न्याय विरुद्धको कसुरमा किटानी जाहेरी दिएका थिए । ओझा पुर्व मन्त्री समेत हुन । अदालतले पक्राउ पुर्जी जारी गरेपनि बाँके प्रहरीले भने यसका बारेमा मौन बस्दै आएको छ । बाँके प्रहरीका अनुसार आरोपको बारेमा अनुसन्धानकै क्रममा रहेकाले उपमेयरलाई पक्राउ नगरिएको हो । सर्वदेव ओझाकी श्रीमतीको नाममा रहेको फर्मको भन्सार क्लियरिङ एजेन्ट रहेको बेला सामानहरुमा ठगी गरेको भन्दैं उपमेयर राई विरुद्ध अदालतमा मुद्दा दायर भएको थियो ।

राई विरुद्धमा प्रहरीमा उजुरी दिन गएपनि प्रहरीले लिन नमानेको ओझाले बताएका छन् । प्रहरीले उजुरी लिन नमानेपछि उनले जिल्ला सरकारी वकिलको कार्यालयमार्फत मुद्दा दर्ता गराएका थिए । ओझाले गत पुस २ गते प्रहरीमा जाहेरी दिन गएका थिए । तर प्रहरीले उजुरी दर्ता नगरेको उनले आरोप लगाए । त्यसपछि ओझाले गत माघ ४ गते सरकारी वकिलको कार्यालयमार्फत जाहेरी दिए ।

२०६२ सालदेखि २०६९ सालसम्म बीउको आयात निर्यातको कारोबार गर्ने मनीषा एग्री कन्सर्न नेपालगन्जका भन्सार क्लियरिङ एजेन्ट रहेका राईले २०६७ सालपछि मिली ठगी गरेको विषयमा अदालतमा मुद्दा परेको उल्लेख छ । जाहेरीमा राईले भारतबाट पैठारी गर्ने मनीषा एग्री बायो टेक कम्पनी प्रालिको कागजातमा बाबुको नाम अकबर अली उल्लेख गरेको र अदालतको लिखित वयानमा बाबुको नाम गोबरे कवडिया बताएको उल्लेख गरेका थिए । राईले ठेगाना नेपालगन्ज वडा नम्बर १५ हुनुपर्नेमा नेपालगन्ज–२० भनेर उल्लेख गरेर अदालतलाई पनि गलत सुचना दिएको आरोप लागेको छ ।