संस्थापक मेल्बिनको सम्झनामा साताव्यापी सामाजिक कार्य गर्दै लायन्स

कालपृष्ठ समाचारदाता
नेपालगन्ज, २० पुष

मानवीय सेवाको क्षेत्रमा अग्रणी संस्थाको परिचय बनाएको लायन्स क्लब इन्टरनेशनल डिस्ट्रिक ३२५ एनले संस्थापकको सम्झनामा विविध कार्यक्रम गर्ने तयारी गरेको छ । लायन्सका संस्थापक मेल्बिन जोन्सको १ सय ४५औं जन्मोत्सवको अवसरमा लायन्स क्लब इन्टरनेशनल डिस्ट्रिक्ट ३२५ एन अन्तर्गत एरिया ४ का बाँके र बर्दियाका लायन्स क्लबहरुले संयुक्त रुपमा दुई जिल्लामा कार्यक्रम गर्ने तयारी गरेका छन् ।

लायन्सले काम गर्ने मुख्य ६ क्षेत्र क्यान्सर, भोकमरी, वातावरण, दृष्टि, युवा, मानवियता, फेलोसिप र अन्य सामाजिक कार्यहरुलाई प्राथमिकतामा राखेर मेल्बिनको जन्मोत्सव मनाउने तयारी गरिएको लायन्स क्लब इन्टरनेशनल डिस्ट्रिक्ट ३२५ एन को क्याभिनेट सेक्रेटरी उमा थापाले बताईन् ।

बाँके र बर्दियाका विभिन्न स्थानमा सामाजिक कार्य गर्ने तयारी गरिएको छ । शुक्रबार १ सय ४५औं मेल्बिन जोन्स डे सेलिब्रेसन कार्यक्रम संयोजक सरिता शाक्यले पत्रकार सम्मेलनमा साताव्यापी कार्यक्रमहरुको बारेमा जानकारी गराईन् ।

पुष २२ देखि २८ गते सम्म गरिब तथा विपन्न वर्गका जनतालाई सहयोग गर्ने कार्यक्रम गर्न लागेको आयोजकले जनाएको छ । मेल्बिनको जन्मोत्सवको अवसरमा महिलाको क्यान्सर सम्बन्धी परिक्षण, न्यानो कपडा वितरण, स्वास्थ्य शिविर,(आँखा, कान, घाटी, मधुमेह, दन्त, एचआइभी), खाद्यान्न वितरण, शैक्षिक सामाग्री वितरण, सर्जिकल र औषधी वितरण, सरसफाई, रक्तदान, वृक्षारोपण, फेलोसिप लगायतका कार्यक्रम गर्ने तयारी भएको कार्यक्रम संयोजक सरिता शाक्यले बताईन् ।

बाँके र बर्दियाका विभिन्न लायन्स क्लबहरुको आयोजनामा विभिन्न ठाउँमा कार्यक्रम हुनेछन् । विश्वभर सामाजिक कार्यमा प्रेरणा प्रदान गर्ने संस्थापक मेल्बिन जोन्सको जन्मोत्सवलाई भव्य बनाउन सम्पुर्ण लायन्स सदस्य, नागरिक समाजलाई शाक्यले अनुरोध गरेकी छिन् ।

शुक्रबार भएको पत्रकार सम्मेलनमा लायन्स क्लब इन्टरनेशनल डिस्ट्रिक ३२५ एनका डिस्ट्रिक गर्भनर मुकुट ढकाल, पुर्व गर्भनर श्याम राज शाक्य, मधुसुदन शर्मा, क्याभिनेट सेक्रेटरी उमा थापाले लायन्सले गरेको काम र योजनाहरुको बारेमा जानकारी गराएका थिए ।

लायन्स क्लब इन्टरनेशनल विश्वको सबै भन्दा ठुलो सामाजिक संस्था हो । सन् १९१७ सालमा मेल्बिन जोन्सले स्थापना गरेको लायन्स क्लब इन्टरनेशनलमा १४ लाख बढि सदस्यहरु रहेका छन् । १ सय ५ वर्षदेखि विश्वको सामाजिक सेवामा अग्रसर लायन्स क्लब सन् १९७१ सालदेखि नेपालमा क्रियाशिल छ । नेपालमा करिब ५० हजार सदस्यहरु रहेका छन् ।