राष्ट्रिय महिला हक्की प्रतियोगिता : पहिलो खेलमा लुम्बिनीद्धारा बागमती पराजित

कालपृष्ठ समाचारदाता
नेपालगन्ज, १५ फागुन

मधेश प्रदेशको धनुषामा जारी प्रथम मदन भण्डारी राष्ट्रिय महिला हक्की प्रतियोगितामा लुम्बिनी प्रदेश नेपालगन्जले आफ्नो पहिलो खेलमा बागमती प्रदेशलाई पराजित गरेको छ । धनुषाको क्षिरेश्वर नगरपालिकास्थित क्षिरेश्वर माबिको खेल मैदानमा फागुन १४ गतेदेखि शुरु भएको प्रतियोगिताको आफ्नो पहिलो खेलमा लुम्बिनी प्रदेश नेपालगन्जले बागमती प्रदेशलाई ५–० गोल अन्तरले पराजित गरेको हो ।

दुई समूहमा बिभाजन गरिएको टिम अन्तर्गत समूह ‘ए’ मा कोशी, मधेश, मदन भण्डारी स्पोर्टस एकेडमी र त्रिभुवन आर्मी क्लब तथा समूह ‘बि’ मा बागमती, लुम्बिनी, गण्डकी र सुदूरपश्चिम प्रदेश रहेका छन् । प्रतियोगितामा पहिलो दिनको दोस्रो खेलमा लुम्बिनीले बागमतीलाई हराएको हो ।

…………

प्रतिस्पर्धामा होमिएको लुम्बिनी प्रदेश नेपालगन्ज टिममा सहभागि सबै खेलाडी नेपालगन्जका हुन । टिममा नेपालगन्जको सरस्वती र मंगल प्रसाद माध्यमिक बिद्यालयका खेलाडीहरु सहभागि रहेको मंगलका खेल प्रशिक्षक इन्द्रसिंह डाँगीले जानकारी दिनुभयो ।

उहाँका अनुसार टिमका आठ जना खेलाडी मंगल माबिका छन् । उहाँले खेलमा छात्राहरुको कडा मेहनत देखिएको बताउनुभयो । बिद्यालयले खेलका लागि तयार गरेको वातावरणले खेलाडीहरु खेलप्रति उत्साहित भएकाले अब्बल खेलाडी निर्माणमा सहयोग पुगेको प्रशिक्षक डाँगीले बताउनुभयो ।

खेल तालिका अनुसार प्रतियोगितामा लुम्बिनी प्रदेश नेपालगन्जले दोस्रो खेलमा गण्डकी प्रदेश र तेस्रो खेलमा सुदूरपश्चिम प्रदेशसँग प्रतिस्पर्धा गर्ने भएको छ । मदन भण्डारी स्पोर्टस एकेडमीको आयोजनामा शुरु भएको प्रतियोगिता फागुन १९ गतेसम्म चल्नेछ ।